Palestine સમર્થક વિદ્યાર્થી મહમૂદ ખલીલની ધરપકડ પર હોબાળો, યુએસ કોર્ટે તેને દેશનિકાલ કરવાનો જાહેર કર્યો નિર્ણય
Palestine: અમેરિકામાં પેલેસ્ટાઇન સમર્થક કાર્યકર્તા અને કોલંબિયા યુનિવર્સિટીના વિદ્યાર્થી મહમૂદ ખલીલની ધરપકડ અને હવે સંભવિત દેશનિકાલ અંગેનો વિવાદ વધુ ઘેરો બની રહ્યો છે. મહમૂદ ખલીલને 8 માર્ચ, 2025 ના રોજ ન્યૂયોર્કમાં તેમના એપાર્ટમેન્ટમાંથી ધરપકડ કરવામાં આવી હતી. આ ધરપકડ બાદ, સેંકડો લોકોએ ન્યૂયોર્કમાં ટ્રમ્પ ટાવરની બહાર વિરોધ પ્રદર્શન કર્યું હતું.
હવે અમેરિકન ઇમિગ્રેશન કોર્ટે ખલીલને દેશનિકાલ કરવાની પરવાનગી આપી દીધી છે. આ નિર્ણય લ્યુઇસિયાનાના લાસેલ ઇમિગ્રેશન કોર્ટના ન્યાયાધીશ જેમી કોમન્સ દ્વારા આપવામાં આવ્યો હતો. જો કે આ અંતિમ નિર્ણય નથી, પરંતુ પેલેસ્ટાઇન તરફી વિદ્યાર્થીઓ સામે ટ્રમ્પ વહીવટીતંત્રના વલણ માટે તેને એક મોટી કાનૂની જીત માનવામાં આવી રહી છે.
દેશનિકાલ પાછળનું કારણ શું છે?
યુએસ સેક્રેટરી ઓફ સ્ટેટ માર્કો રુબિયોએ ખલીલ વિરુદ્ધ એક પત્ર જારી કર્યો હતો, જેમાં 1952ના ઇમિગ્રેશન અને રાષ્ટ્રીયતા અધિનિયમનો ઉલ્લેખ કરવામાં આવ્યો હતો. તેમાં કહેવામાં આવ્યું હતું કે ખલીલની પ્રવૃત્તિઓ યુએસ વિદેશ નીતિના હિતોની વિરુદ્ધ હતી. રુબિયોએ એમ પણ લખ્યું છે કે ખલીલ “યહૂદી વિરોધી વિરોધ પ્રદર્શનો અને વિક્ષેપકારક પ્રવૃત્તિઓમાં સામેલ રહ્યો છે”, જેના કારણે યુ.એસ.માં યહૂદી વિદ્યાર્થીઓ માટે “પ્રતિકૂળ વાતાવરણ” સર્જાયું છે.
ખલીલ પર કોઈપણ યુએસ કાયદાનું ઉલ્લંઘન કરવાનો આરોપ મૂકવામાં આવ્યો નથી, તેમ છતાં સ્ટેટ ડિપાર્ટમેન્ટ દલીલ કરે છે કે “અન્યથા કાયદેસર” નિવેદનો અને સંગઠનો પણ જો યુએસ વિદેશ નીતિને નુકસાન પહોંચાડે તો દેશનિકાલ માટેનું કારણ બની શકે છે.
90 મિનિટની સુનાવણી, મર્યાદિત સમયમાં જવાબો
90 મિનિટની સુનાવણી દરમિયાન, ખલીલના વકીલોએ કોર્ટને તેમના દાવાના આધારની તપાસ કરવા માટે રૂબિયોને બોલાવવાની મંજૂરી આપવા કહ્યું. પરંતુ ન્યાયાધીશે આ માંગણી ફગાવી દીધી. વકીલોએ એવી પણ ફરિયાદ કરી હતી કે તેમની પાસે રૂબિયોના પત્ર અને સરકાર દ્વારા સબમિટ કરાયેલા દસ્તાવેજોની સમીક્ષા કરવા માટે 48 કલાકથી ઓછા સમય છે.
ખલીલ વતી કોર્ટમાં શું કહેવામાં આવ્યું?
સુનાવણીના અંતે, ખલીલે કોર્ટ પાસે બોલવાની પરવાનગી માંગી અને કહ્યું:
“આજે આપણે જે જોયું તેમાં યોગ્ય પ્રક્રિયા કે મૂળભૂત ન્યાયીપણાની કોઈ ઝલક નહોતી. એટલા માટે ટ્રમ્પ વહીવટીતંત્રે મને મારા પરિવારથી હજારો માઇલ દૂર આ કોર્ટહાઉસમાં મોકલ્યો.”
મહમૂદ ખલીલ કોણ છે?
મહમૂદ ખલીલ સીરિયાના પેલેસ્ટિનિયન શરણાર્થી શિબિરમાં જન્મેલો વિદ્યાર્થી છે અને તેની પાસે અલ્જેરિયાની નાગરિકતા છે. તેઓ પેલેસ્ટાઇન તરફી વિદ્યાર્થી ચળવળમાં એક અગ્રણી ચહેરો છે. તેઓ CUAD જૂથ સાથે પણ સક્રિય રીતે સંકળાયેલા છે, જે ગાઝા યુદ્ધવિરામ અને ઇઝરાયલ સામે આર્થિક પ્રતિબંધોની હિમાયત કરે છે.
ખલીલ ગયા વર્ષે અમેરિકાના કાયમી નિવાસી બન્યા અને તેમની પત્ની અમેરિકન નાગરિક છે.
આગળ શું થશે?
ખલીલ હાલમાં લુઇસિયાનાની જેલમાં બંધ છે. જજ કોમન્સે તેમના વકીલોને રાહત માટે અરજી કરવા માટે 23 એપ્રિલ સુધીનો સમય આપ્યો છે. દરમિયાન, ન્યુ જર્સીની એક અલગ કોર્ટે તેમના દેશનિકાલને રોકી દીધો છે, અને કહ્યું છે કે આ મુદ્દો યુએસ બંધારણના પ્રથમ સુધારા હેઠળ અભિવ્યક્તિની સ્વતંત્રતા સાથે સંકળાયેલો છે.
