Nepal: કલિંગા યુનિવર્સિટી કેસમાં નેપાળ સરકારની ધમકી; ‘ભારત જવા માટે વિદ્યાર્થીઓને NOC નહીં આપીએ’
Nepal: નેપાળી વિદ્યાર્થી પ્રકૃતિ લમસલના શંકાસ્પદ સંજોગોમાં મૃત્યુ બાદ, નેપાળ સરકારે કડક વલણ અપનાવ્યું છે. ૧૬ ફેબ્રુઆરીના રોજ કલિંગા ઇન્સ્ટિટ્યૂટ ઓફ ઇન્ડસ્ટ્રિયલ ટેકનોલોજી (KIIT) ના હોસ્ટેલમાંથી ૨૦ વર્ષીય પ્રકૃતિનો મૃતદેહ મળી આવ્યો હતો અને આ ઘટનાને કારણે KIIT કેમ્પસમાં આત્મહત્યાના આરોપો સાથે અશાંતિ ફેલાઈ ગઈ હતી. નેપાળ સરકારે આ અંગે ઊંડી ચિંતા વ્યક્ત કરી છે અને કહ્યું છે કે જો ન્યાય નહીં મળે, તો તે ઓડિશાની કોઈપણ યુનિવર્સિટી અથવા શૈક્ષણિક સંસ્થામાં અભ્યાસ કરવા માટે તેના વિદ્યાર્થીઓને નો ઓબ્જેક્શન સર્ટિફિકેટ (NOC) આપવાનું સ્થગિત કરી શકે છે.
નેપાળના શિક્ષણ મંત્રાલયે આ બાબતે પોતાના નિવેદનમાં કહ્યું છે કે આવા ગંભીર મામલા પર તાત્કાલિક કાર્યવાહીની જરૂર છે અને નેપાળના વિદ્યાર્થીઓની સુરક્ષા સુનિશ્ચિત કરવી જોઈએ. નેપાળ સરકાર દ્વારા આ ચેતવણી આપવામાં આવી છે કે જો ભારતમાં શિક્ષણ મેળવતી વખતે આવી ઘટનાઓ બનતી રહેશે, તો તેઓ ભવિષ્યમાં વિદ્યાર્થીઓને NOC નહીં આપે જેના કારણે ભારતીય યુનિવર્સિટીઓમાં નેપાળી વિદ્યાર્થીઓની સંખ્યા પર અસર પડી શકે છે.
આ મામલો નેપાળની સંસદમાં પણ ઉઠાવવામાં આવ્યો છે, અને નેપાળ સરકારે ભારત તરફથી યોગ્ય કાર્યવાહીની આશા વ્યક્ત કરી છે. ભારત સરકારે વિદ્યાર્થીઓની સુરક્ષા સુનિશ્ચિત કરવા માટે પગલાં લેવાની ખાતરી આપી છે, પરંતુ આ મુદ્દાએ શિક્ષણ અને વિદ્યાર્થીઓની સુરક્ષા સંબંધિત બંને દેશો વચ્ચેના સંબંધોને નવો વળાંક આપ્યો છે.
