Qamar Cheema પાકિસ્તાનને હળવાશથી ન લો, પરમાણુ હથિયારોથી જવાબ મળી શકે છે – પાકિસ્તાની નિષ્ણાત કમર ચીમાનો ચેતવણીભર્યો દાવો
Qamar Cheema 22 એપ્રિલે જમ્મુ-કાશ્મીરના પહેલગામમાં થયેલા આતંકી હુમલા પછી ભારત અને પાકિસ્તાન વચ્ચે તણાવની સ્થિતિ વધુ ઘેરાઈ ગઈ છે. આવા સમયે પાકિસ્તાની રાજકીય અને રણનીતિક નિષ્ણાત કમર ચીમાએ ભારતના પરમાણુ નીતિ સંદર્ભે ચોંકાવનારો દાવો કર્યો છે. તેમણે કહ્યું છે કે ભારત હવે પોતાની ‘નો ફર્સ્ટ યુઝ’ નીતિમાંથી આગળ વધી રહ્યું છે અને પહેલાં હથિયાર ચલાવવાની તૈયારીમાં છે, જેને ગંભીરતાથી લેવી જોઈએ.
કમર ચીમાએ કહ્યું કે, “ભારત પોતાની પરમાણુ શસ્ત્રોની નીતિમાં ફેરફાર કરી રહ્યું છે. તે હવે દુનિયાને સ્પષ્ટ સંકેત આપી રહ્યું છે કે પાકિસ્તાન સામે પહેલું પગલું ભારત પણ લઈ શકે છે.” તેમણે યાદ અપાવ્યું કે 16 ઑગસ્ટ 2019ના રોજ ભારતના સંરક્ષણ મંત્રી રાજનાથ સિંહે ખુલાસો કર્યો હતો કે “નો ફર્સ્ટ યુઝ” નીતિ કાયમ માટે નથી અને જરૂર પડે તો તેની સમીક્ષા કરવામાં આવશે.
પાકિસ્તાન તરફથી એ દાવો કરવામાં આવી રહ્યો છે કે જો ભારત તરફથી કોઈ મોટું હિંસક પગલું લેવાશે, તો તેઓ પણ કોઈક નરમવૃત્તિથી નહીં, સીધા પરમાણુ હથિયારોથી જવાબ આપશે. ચીમાએ કહ્યું, “પાકિસ્તાન ક્વિડ પ્રો ક્વો પ્લસ તરફ જશે, એટલે કે જવાબ પણ એના કરતા વધુ તીવ્ર અને ઉગ્ર રહેશે.”
અત્યારે આખો વિસ્તાર તણાવમાં છે. આતંકી હુમલાની પૃષ્ઠભૂમિમાં ભારત તરફથી પણ ઉગ્ર નિવેદનો આવ્યા છે અને પાકિસ્તાનને મૌનથી નહી, પણ ઉગ્ર કાર્યવાહીના ઈશારા મળ્યા છે. ભારતની નીતિમાં આવતો બદલાવ આતંકવાદ સામે શૂન્ય સહિષ્ણુતાની સ્પષ્ટ ઝાંખી આપે છે.
કમર ચીમાના દાવા અંતરરાષ્ટ્રીય સ્તરે ચિંતાનો વિષય બની શકે છે, કારણ કે બંને દેશો પાસે પરમાણુ શક્તિ છે અને કોઈ પણ પ્રકારની ઉશ્કેરણી વિશ્વમાં અસામાન્ય અસરો પેદા કરી શકે છે.
