Donald Trumpનું 43 કરોડ રૂપિયાનું ‘ગોલ્ડ કાર્ડ’, સ્થળાંતરનો નવો માર્ગ કે વિવાદાસ્પદ પગલું?
Donald Trump: અમેરિકાના રાષ્ટ્રપતિ ડોનાલ્ડ ટ્રમ્પે ગુરુવાર, ૩ એપ્રિલના રોજ તેમના શાહી વિમાન ‘એરફોર્સ વન’ પર પત્રકારોને એક કાર્ડ બતાવ્યું. આ કાર્ડની કિંમત લગભગ ૪૩ કરોડ રૂપિયા છે. આ કાર્ડ પર ડોનાલ્ડ ટ્રમ્પનો ફોટો છે, તેથી તેને ટ્રમ્પ કાર્ડ પણ કહેવામાં આવી રહ્યું છે. પરંતુ આ કાર્ડ આટલું મોંઘુ કેમ છે અને ખરીદનારને આ કાર્ડથી શું ફાયદો થશે, લોકો ગુગલ પર આ વિશે સર્ચ કરી રહ્યા છે. આજે અમે તમને આ કાર્ડની વિશેષતાઓ વિશે સંપૂર્ણ માહિતી આપી રહ્યા છીએ.
Donald Trump: ડોનાલ્ડ ટ્રમ્પે પત્રકારો સમક્ષ ચમકતું કાર્ડ બતાવ્યું અને કહ્યું, “આ 5 મિલિયન ડોલરમાં તમારું હોઈ શકે છે.” પછી તે હસ્યો અને બોલ્યો, “આ પહેલું કાર્ડ છે, અને શું તમે જાણો છો કે તે શું છે? આ ગોલ્ડ કાર્ડ છે – મારું ટ્રમ્પ કાર્ડ!” આ કાર્ડનો રંગ ધાતુ જેવો સોનેરી છે, અને તેના પર ખુદ ટ્રમ્પનો ફોટો છપાયેલો છે. આ કાર્ડ વાસ્તવમાં એક દસ્તાવેજ છે જે વિદેશી નાગરિકોને અમેરિકામાં સ્થાયી થવાની સુવર્ણ તક આપે છે. તેની જાહેરાત ફેબ્રુઆરીમાં કરવામાં આવી હતી, અને હવે તે ચર્ચાનો વિષય બની ગયો છે. આ કાર્ડ 5 મિલિયન ડોલરના રોકાણના બદલામાં યુએસ રહેઠાણ આપે છે, એટલે કે તે ગ્રીન કાર્ડ જેવા અધિકારો આપે છે. જોકે તે તાત્કાલિક નાગરિકતા આપતું નથી, પરંતુ આ કાર્ડ ભવિષ્યમાં યુએસ નાગરિકતાનો માર્ગ ખોલી શકે છે.
પ્રથમ ખરીદનાર કોણ છે?
ટ્રમ્પે પોતાને આ કાર્ડના પહેલા ખરીદનાર તરીકે ગણાવ્યા હતા, પરંતુ હજુ સુધી તે સ્પષ્ટ નથી કે બીજો માલિક કોણ હશે. “તે બે અઠવાડિયાથી ઓછા સમયમાં ઉપલબ્ધ થશે,” તેમણે કહ્યું. તેનો અર્થ એ કે તે 17-18 એપ્રિલ સુધીમાં દુનિયા સમક્ષ જાહેર થઈ શકે છે. પરંતુ આ કેવી રીતે પ્રાપ્ત કરવું તે અંગેની માહિતી હજુ સુધી જાણીતી નથી. આ ગોલ્ડ કાર્ડ પરંપરાગત ગ્રીન કાર્ડનું પ્રીમિયમ વર્ઝન છે. ગ્રીન કાર્ડથી યુ.એસ.માં કાયમી ધોરણે રહેવા અને કામ કરવાની મંજૂરી મળે છે, પરંતુ નાગરિકતા મેળવવા માટે “નેચરલાઈઝેશન” નામની લાંબી પ્રક્રિયાની જરૂર પડે છે.
અમેરિકા મોટો નફો કમાશે!
અમેરિકાને આ નવા વિઝાથી મોટો નફો થવાની અપેક્ષા છે. ટ્રમ્પ કહે છે કે આ કાર્યક્રમ શ્રીમંત ઉદ્યોગપતિઓને આકર્ષિત કરશે જે રોજગારીનું સર્જન કરશે અને અર્થતંત્રને વેગ આપશે. તેમના શબ્દોમાં, “આ લોકો ધનવાન, સફળ, ઘણા પૈસા ખર્ચ કરશે, કર ચૂકવશે અને લોકોને રોજગાર આપશે. અમને લાગે છે કે આ ખૂબ જ સફળ થશે.” આ વાત સાંભળવામાં ભલે સરસ લાગે, પણ આ ચમક અને ગ્લેમર પાછળ એક કાળી બાજુ છુપાયેલી છે.
ભારતીયો માટે સમસ્યા
કાળી બાજુ એ છે કે તે ભારતીયો માટે સમસ્યાઓ ઊભી કરી શકે છે. જે લોકો વર્ષોથી EB-5 પ્રોગ્રામ દ્વારા અમેરિકામાં સ્થાયી થવાનું સ્વપ્ન જોઈ રહ્યા છે, તેમના માટે હવે 43 કરોડ રૂપિયાની આ શરત ખૂબ જ મુશ્કેલ બનશે. ટીકાકારો કહે છે કે આ પગલું હાલની અસમાનતાઓને વધુ ગાઢ બનાવશે. ખાસ કરીને એવા કુશળ વ્યાવસાયિકો માટે જેઓ દાયકાઓથી ગ્રીન કાર્ડ માટે કતારમાં રાહ જોઈ રહ્યા છે.
