Bangladesh Crisis: બાંગ્લાદેશના વડાપ્રધાન શેખ હસીનાને અનામત વિરોધી આંદોલનને કારણે પોતાની ખુરશી ગુમાવવી પડી હતી. રાજીનામું આપ્યા બાદ તેમણે ગઈકાલે એટલે કે સોમવારે દેશ છોડીને ભારત આવવું પડ્યું હતું. ત્યારે સેનાએ દેશની કમાન પોતાના હાથમાં લઈ લીધી છે. બાંગ્લાદેશના આર્મી ચીફે પ્રદર્શનકારીઓને શાંતિ જાળવવાની અપીલ કરી અને કહ્યું કે દેશમાં ટૂંક સમયમાં વચગાળાની સરકારની રચના કરવામાં આવશે. સવાલ એ છે કે હવે કમાન કોણ સંભાળશે? ચાલો જાણીએ કે બાંગ્લાદેશની વચગાળાની સરકારના વડાપ્રધાન પદની રેસમાં કોણ છે.

ખાલિદા ઝિયાને મુક્ત કરવાનો આદેશ

બાંગ્લાદેશની વચગાળાની સરકારના પીએમ પદની રેસમાં ખાલિદા ઝિયાનું નામ પણ હેડલાઇન્સમાં છે, કારણ કે સેના સત્તામાં આવ્યા બાદ બાંગ્લાદેશના રાષ્ટ્રપતિ મોહમ્મદ શહાબુદ્દીને ત્રણેય સેના, આર્મી, નેવી અને એરફોર્સના વડાઓની નિમણૂક કરી, બાંગ્લાદેશ રાષ્ટ્રવાદી પાર્ટી (BNP) અને જમાત – ઇસ્લામી પાર્ટી સહિત ઘણા વિરોધ પક્ષોના ટોચના નેતાઓ સાથે એક મહત્વપૂર્ણ બેઠક યોજી. આ બેઠકમાં લેવાયેલ સૌથી મોટો નિર્ણય BNP ચીફ અને બાંગ્લાદેશના પૂર્વ વડાપ્રધાન ખાલિદા ઝિયાની મુક્તિનો હતો. આ ઉપરાંત જે બે મુખ્ય નિર્ણયો લેવામાં આવ્યા હતા તે નીચે મુજબ છે-

વિરોધ પ્રદર્શન દરમિયાન ધરપકડ કરાયેલા તમામ લોકોને મુક્ત કરવામાં આવશે.

આ બેઠકમાં દેશમાં તાત્કાલિક વચગાળાની સરકાર બનાવવાનો નિર્ણય લેવામાં આવ્યો હતો.

કોણ છે ખાલિદા ઝિયા?
ખાલિદા ઝિયા બાંગ્લાદેશના પૂર્વ વડાપ્રધાન રહી ચૂક્યા છે. તેમને શેખ હસીનાના કટ્ટર હરીફ માનવામાં આવે છે. તે મુખ્ય વિપક્ષી પાર્ટી BNP ના પ્રમુખ છે. 2018 માં, તેમને ભ્રષ્ટાચાર માટે 17 વર્ષની જેલની સજા ફટકારવામાં આવી હતી. તેના પર અનાથાશ્રમ ટ્રસ્ટ માટેના દાનમાં આશરે $250,000ની ઉચાપત કરવાનો આરોપ હતો. તેને નજરકેદ રાખવામાં આવ્યો હતો. જોકે, BNPનો દાવો છે કે તેમને રાજકારણથી દૂર રાખવા માટે આ આરોપો ઘડવામાં આવ્યા છે. જ્યારે હસીના સરકારે આ આરોપોને નકારી કાઢ્યા હતા.

યુનુસનું નામ પણ રેસમાં છે

ખાલિદા ઝિયા ઉપરાંત બાંગ્લાદેશના નવા વડાપ્રધાન તરીકે મોહમ્મદ યુનુસનું નામ પણ સામે આવી રહ્યું છે. નોબેલ પુરસ્કાર વિજેતા મોહમ્મદ યુનુસ દેશની ગ્રામીણ બેંકના ભૂતપૂર્વ મેનેજિંગ ડિરેક્ટર છે. જોકે, વિદ્યાર્થી આંદોલનના વડા નાહીદ ઈસ્લામે મોહમ્મદ યુનુસને વચગાળાની સરકારના મુખ્ય સલાહકાર બનાવવાનો પ્રસ્તાવ મૂક્યો છે. મોહમ્મદ યુનુસે પણ આ માટે પોતાની સંમતિ આપી દીધી છે. તેમના અમેરિકા સાથે સારા સંબંધો હોવાનું કહેવાય છે.

આ પણ પીએમ પદના દાવેદાર છે

ખાલિદા ઝિયા અને મોહમ્મદ યુનુસ ઉપરાંત તારિક રહેમાન, વરિષ્ઠ વકીલ સારા હુસૈન, નિવૃત્ત થ્રી સ્ટાર જનરલ જહાંગીર આલમ ચૌધરી, બાંગ્લાદેશ બેંકના ભૂતપૂર્વ ગવર્નર સાલેહુદ્દીન અહેમદ રેસમાં છે. તારિક રહેમાન ખાલિદા ઝિયાના પુત્ર છે. ખાલિદા ઝિયા 78 વર્ષની હોવાથી તેમને સ્વાસ્થ્ય સંબંધિત ઘણી સમસ્યાઓ પણ છે. તેથી તેમની જગ્યાએ તેમના પુત્ર તારિક રહેમાનને પણ વચગાળાની સરકારના પીએમ તરીકે દાવેદાર માનવામાં આવી રહ્યા છે. એવું કહેવામાં આવી રહ્યું છે કે સલીમુલ્લા ખાન અને આસિફ નઝરૂલ પણ વચગાળાની સરકારની રચનામાં મહત્વની ભૂમિકા ભજવશે.

બાંગ્લાદેશમાં હવે શું થશે
શેખ હસીના હાલમાં ભારતમાં છે અને આશ્રય મેળવવાની આશાએ લંડન જવાની યોજના બનાવી રહી છે. બાંગ્લાદેશમાં વચગાળાની સરકારની રચના બાદ દેશનું તેમના પ્રત્યે શું વલણ છે તે જોવાનું રહે છે. બાંગ્લાદેશની સંસદ મંગળવારે ભંગ કરવામાં આવશે. સાથે જ આર્મી ચીફ વકર-ઉઝ-ઝમાન રાષ્ટ્રને સંબોધિત કરી શકે છે. આ ઉપરાંત વચગાળાની સરકારનો હવાલો કોણ લેશે તે અંગે પણ ચિત્ર સ્પષ્ટ થઈ શકે છે.