વડોદરાઃ ઘરમાં થયેલા ઝગડા ક્યારે કોર્ટના પગથિયા સુધી પહોંચી જતા હોય છે. ત્યારે કેટલાક એવા કિસ્સાઓ હોય છે જેને જાણીને આપણને નવાઈ લાગે. આવો જ એક કિસ્સો વડોદરામાં બન્યો છે. અહીં પરિણીતાએ પોતાના પતિ સાથે નહીં પરંતુ પ્રેમી સાથે રહેવા માટે કોર્ટ સમક્ષ નિવેદન આપ્યું હતું. અને પોતાના બંને સંતાનોની જવાબદારી પતિને આપવા પણ કહ્યું હતું. અત્યારે કોર્ટે મહિલાને નારી સંરક્ષણમાં મોકલી આપી છે. નવાઈની વાત તો એ છે કે મહિલા એક વર્ષ પહેલા પોતાના પ્રેમી સાથે ભાગી હતી અને બંનેને એક બાળક પણ થયું છે.
આ અંગે મળતી માહિતી પ્રમાણે, વડોદરા શહેરના હરણી રોડ વિસ્તારમાં રહેતી 33 વર્ષની મહિલા જેને બે સંતાન પણ છે. તે ગતવર્ષે એટલે જાન્યુઆરી, 2020ના રોજ બપોરે અઢી કલાકે ઘરેથી ભાગી ગઇ હતી. પરિવારે જે અંગેની જાણ વારસિયા પોલીસ સ્ટેશનમાં પણ કરી હતી. આ મહિલા તેના વતન રાજસ્થાન તેના પ્રેમી રાજેન્દ્રપ્રસાદ કુમાવત સાથે જતી રહી હતી. આ જાણ થતા સાસરી પક્ષે ગુજરાત હાઇકોર્ટમાં હેબિયસ કોર્પસ રિટ દાખલ કરી હતી.
પોલીસ તપાસમાં સામે આવ્યું હતું કે, મહિલા તેના પ્રેમી રાજેન્દ્રપ્રસાદ કુમાવત સાથે નૈનિતાલ છે. ત્યાંથી આ બંનેને પોલીસે ઝડપી પાડ્યા હતા. આ એક વર્ષ દરમિયાન આ લોકોએ એક બાળકને પણ જન્મ આપ્યો છે. જોકે, મહિલાએ પોલીસને જણાવી દીધું હતું કે, મારે મારા પતિના ઘરે નથી જવું. હું મારા પ્રેમી સાથે જ રહીશ. લગ્નજીવન દરમિયાન થયેલા બે બાળકોની કસ્ટડી પતિને આપી દો. જેથી પોલીસે હાલ મહિલાને નારી સંરક્ષણ ગૃહમાં મોકલી આપી છે.
મહિલાને હાઇકોર્ટ સમક્ષ પર રજૂ કરવામાં આવતા ત્યાં પણ મહિલાએ બે બાળકોને પતિને સોંપી દો તેવી માંગણી કરી હતી. જોકે, બીજીતરફ તેના પ્રેમી રાજેન્દ્રના પણ છૂટાછેડા થયા નથી. તેથી મહિલાને હાઇકોર્ટે નીરી સંરક્ષણ ગૃહમાં મોકલી આપી છે. આ અંગેની સુનાવણી હવે 10 દિવસ બાદ થવાની છે.
