યુપી ઇન્વેસ્ટર્સ સમિટનો પ્રારંભઃ અંબાણીએ યોગીને ગણાવ્યા કર્મયોગી

વડાપ્રધાન નરેન્દ્ર મોદી આજે લખનઉ પહોંચ્યા છે. અહીંયા તેમણે ઇંદિરા ગાંધી પ્રતિષ્ઠાનમાં ‘યુપી ઇન્વેસ્ટર્સ સમિટ-2018’ (UPIS)નો પ્રારંભ કરાવ્યો. સમિટની શરૂઆતમાં રિલાયન્સ ઇન્ડસ્ટ્રીઝ લિમિટેડના ચેરમેન મુકેશ અંબાણીએ સ્પીચ આપી. અંબાણીએ કહ્યું, “20,000 કરોડ રૂપિયાના ઇન્વેસ્ટમેન્ટ સાથે જિયો એ યુપીના મોટામાં મોટા ઇન્વેસ્ટર્સમાંનું એક છે. 2018 સુધીમાં યુપીના દરેક ગામમાં જિયો હશે.” અંબાણીએ સીએમ યોગીને કર્મયોગી ગણાવ્યા.
ઉલ્લેખનીય છે કે, આ સમિટ 2 દિવસો સુધી ચાલશે અને તેમાં દુનિયાભરના 5 હજાર ઉદ્યોગપતિઓ સામેલ થશે. યોગી સરકારનો દાવો છે કે આ સમિટ દ્વારા રાજ્યના 20 લાખ યુવાનોને રોજગાર મળશે. આશા છે કે આ દરમિયાન 900 એમઓયુ પર સહી થશે. આ દરમિયાન પીએમ ઉપરાંત કેન્દ્રના 19 મંત્રીઓ સ્પીચ આપશે. તે સિવાય બિઝનેસ લીડર્સ, રોકાણકારો અને વિવિધ ક્ષેત્રો સાથે જોડાયેલી હસ્તીઓ પણ સ્પીચ આપશે. રાજ્યના ઔદ્યોગિક વિકાસ મંત્રી સતીશ મહાનાએ કહ્યું, આ સમિટ દ્વારા અમે 5 લાખ કરોડ રૂપિયાના રોકાણ અને 20 લાખથી વધુ લોકોને રોજગાર આપવાનું લક્ષ્યાંક રાખ્યું છે.