ભારતીય રિઝર્વ બેન્કે 9 વર્ષ પછી 2017-18માં ખરીદ્યું 8.46 ટન સોનું

ભારતીય રિઝર્વ બેન્કે (આરબીઆઇ) નાણાંકીય વર્ષ 2017-18માં 8.46 ટન સોનું ખરીદ્યું છે. અંદાજે નવ વર્ષ પછી કેન્દ્રીય બેન્કે પહેલીવાર સોનું ખરીદ્યું છે. આરબીઆઇનાં 2017-18ના વાર્ષિક રિપોર્ટ અનુસાર, તેની પાસે 30 જૂન 2018ના રોજ 566.23 ટન સોનું હતું જ્યારે 30 જૂન 2017ના રોજ સુવર્ણ ભંડાર 557.77 ટન હતો. આ એક વર્ષ દરમ્યાન સોનાના ભંડારમાં 8.46 ટનનો વધારો થયો. આરબીઆઇએ અગાઉ નવેમ્બર 2009માં આંતરરાષ્ટ્રીય મુદ્રા ભંડારમાંથી 200 ટન સોનું ખરીદ્યું હતું. આરબીઆઇએ તેના સ્વર્ણ ભંડારમાંથી 292.30 ટન સોનું નોટ જાહેર કરનારા વિભાગની સંપત્તિ ગણાવ્યું હતું. બાકી 273.93 ટન સોનું બેન્કિંગ વિભાગની સંપત્તિ છે. બેન્કિંગ વિભાગના સોનાનું કુલ મૂલ્ય 30 જૂન 2018ના રોજ 11.12 ટકા વધીને 69,674 કરોડ રૂપિયા થઇ ગયું જ્યારે 30 જૂન 2017ના રોજ તે 62,702 કરોડ રૂપિયા હતું. બેન્ક ઓફ ચાઇના અને બાકી બેન્કોની જેમ આરબીઆઇ સામાન્ય રીતે સોનું નથી ખરીદતી, એટલા માટે આ નિર્ણયને મહત્વપૂર્ણ માનવામાં આવી રહ્યો છે. હાલ આરબીઆઇએ એ નથી જણાવ્યું કે સોનું કેમ અને ક્યાંથી ખરીદવામાં આવ્યું છે, પરંતુ અર્થશાસ્ત્રીઓનું માનીએ તો સેન્ટ્રલ બેન્ક આવનારા સમયમાં ગોલ્ડ બોન્ડ સ્કીમ હેઠળ કેટલાક બોન્ડ્સ વેચી શકે છે, જેની કિંમત અંદાજે 4 હજાર કરોડ રૂપિયા હોઇ શકે છે. આરબીઆઇ પ્રચલિત કિંમતમાં ત્રણ વર્ષથી આંઠ વર્ષ વાળા બોન્ડ છોડાવવાના છે. અને આ વધારાનું સોનું સ્ટોકમાં રાખવા માટે ખરીદવામાં આવ્યું હોય તેવી શક્યતા છે.