મુંબઈઃ એસબીઆઈ મ્યુચ્યુઅલ ફંડ કંપની દેશની સૌથી મોટી કંપની છે. અને હવે આ કંપની પ્રાઇમરી માર્કેટમાં 7,500 કરોડ રૂપિયાનો એકઠાં કરવાનો પ્લાન બનાવી રહી છે. કંપની આ માટે આઈપીઓ લાવવાની તૈયારી કરી રહી છે. મ્યુચ્યુઅલ ફંડ ઈન્ડસ્ટ્રીમાં એસબીઆઈ મ્યુચ્યુઅલ ફંડનો આઈપીઓ સૌથી મોટો આઈપીઓ હશે.
બ્લૂમબર્ગના રિપોર્ટ પ્રમાણે એસબીઆઈ મ્યુચ્યુઅલ ફંડ પોતાના બોર્ડ ઑફ ડિરેક્ટર્સ અને શેરહૉલ્ડર કંપની આમુંડી એસેટ મેનેજમેન્ટ સાથે ચર્ચા કર્યા બાદ ઇન્વેસ્ટમેન્ટ બેન્કર્સ સાથે આ અંગે દરખાસ્ત તૈયાર કરવાની વાત કરશે.
આ રિપોર્ટમાં કહેવામાં આવ્યું છે કે કંપની આગામી એકથી બે મહિનામાં આઈપીઓ લાવવાની પ્રક્રિયા શરૂ કરશે. ઉલ્લેખનીય છે કે એસબીઆઈ મ્યુચ્યુઅલ ફંડની એસેટ અંડર મેનેજમેન્ટ પાંચ લાખ કરોડથી વધારે છે. તેના કુલ એયુએમમાં 40 ટકા હિસ્સો સરકારી પૈસાને કારણે આવે છે.
કંપની કેટલા કરોડનો આઈપીઓ લાવશે તેનો ચોક્કસ આંકડો માર્ચની એયુએમ આવ્યા પછી ખબર પડશે. એસબીઆઈ મ્યુચ્યુઅલ ફંડનું વેલ્યૂએશન હાલ સાત અબજ ડૉલર એટલે કે 52 હજાર કરોડ રૂપિયા છે.
અત્યારસુધી એસબીઆઈની ચાર કંપની સ્ટૉક માર્કેટમાં લિસ્ટ થઈ ચૂકી છે. જેમાં એસબીઆઈ હોમ ફાઇનાન્સ, એસબીઆઈ લાઇફ ઇન્શ્યોરન્સ, એસબીઆઈ કાર્ડ એન્ડ પેમેન્ટ અને ખુદ એસબીઆઈ શામેલ છે. એસબીઆઈ મ્યુચ્યુઅલ ફંડનો આ આઈપીઓ મ્યુચ્યુઅલ ફંડ ઇન્ડસ્ટ્રીઝનો ચોથો પબ્લિક આઈપીઓ છે. આ પહેલા HDFC મ્યુચ્યુઅલ ફંડ, નિપ્પોન મ્યુચ્યુઅલ ફંડ અને યૂટીઆઈ એએમસીનો આઈપીઓ આવી ચૂક્યા છે.
સૌથી પહેલા 2017માં નિપ્પોન મ્યુચ્યુઅલ ફંડે 1,542 કરોડ રૂપિયા એકઠા કર્યા હતા. જે બાદમાં 2018માં HDFC મ્યુચ્યુઅલ ફંડે આઈપીઓ મારફતે 2,800 કરોડ રૂપિયા એકઠા કર્યા હતા. જ્યારે ગત વર્ષે UTI AMCએ આઈપીઓ મારફતે 1,542 કરોડ રૂપિયા એકઠા કર્યાં હતાં.
