ખાનગી બેન્કના શેર ડાઉન

આજે શરૂઆતે શેરબજારમાં શુષ્ક ચાલ જોવા મળી હતી. બીએસઇ સેન્સેક્સ ૩૨ પોઇન્ટને સુધારે ૩૪,૯૩૬, જ્યારે એનએસઇ નિફ્ટી આઠ પોઇન્ટને સુધારે ૧૦,૬૦૧ની સપાટીએ ટ્રેડિંગમાં જોવા મળી હતી. આજે પણ મિડકેપ અને સ્મોલકેપ સેક્ટરના શેરમાં જોરદાર વેચવાલી જોવા મળી હતી. મિડકેપ ઇન્ડેક્સમાં ૦.૧૫ ટકાનો ઘટાડો નોંધાયો હતો, જ્યારે સ્મોલકેપ ઇન્ડેક્સ ૦.૭ ટકા તૂટ્યો હતો. બેન્ક નિફ્ટી પણ ૪૭ પોઇન્ટને ઘટાડે રેડ ઝોનમાં ખૂલી હતી. આજે શરૂઆતે મિડકેપ સેક્ટરના શેર જેવા કે વક્રાંગી, ગ્લેનમાર્ક, ટોરન્ટ ફાર્માના શેરમાં ૧.૫ ટકાથી ત્રણ ટકાનો ઘટાડો જોવાયો હતો. એ જ પ્રમાણે સ્મોલકેપ કંપનીના શેર જેવા કે ગ્રેફાઇટ ઇન્ડિયા, એચઇજી, બિલ્ડકોમના શેર પાંચ ટકા તૂટ્યા હતા, જ્યારે આઇડીએફસી બેન્ક, સન ટીવી, પીસી જ્વેલર્સ, અજમેરા રિયલ્ટી કંપનીના શેરમાં પોઝિટિવ ચાલ જોવા મળી હતી. આજે શરૂઆતે ભારતી એરટેલ, કોલ ઇન્ડિયા, એનટીપીસી, પાવર ગ્રીડ કોર્પોરેશન કંપનીના શેરમાં ૦.૭૩થી ૧.૭૦ ટકાનો સુધારો નોંધાયો હતો, જ્યારે એશિયન પેઇન્ટ્સ, ઇન્ડસ ઇન્ડ બેન્ક, એચડીએફસી, રિલાયન્સ કંપનીના શેરમાં વેચવાલી જોવા મળી હતી. દરમિયાન આજે શરૂઆતે ખાનગી બેન્કના શેરમાં વેચવાલી જોવા મળી હતી. ફેડરલ બેન્ક, એચડીએફસી બેન્ક, આઇસીઆઇસીઆઇ બેન્ક, ઇન્ડસ ઇન્ડ બેન્કના શેરમાં ૦.૧૦ ટકાથી ૦.૭૦ ટકાનો ઘટાડો નોંધાયો હતો.