આઈટી રિટર્ન ફાઈલ નહિ કરનાર બ્લેકલિસ્ટેડ થશે

જે લોકોની આવક આવકવેરાના દાયરામાં આવતી હોય અને જો તે નિશ્ચિત સમયગાળામાં રીટર્ન ફાઈલ નહીં કરાવે તો તેને બ્લેક લીસ્ટેડ કરાશે. બ્લેક લીસ્ટ થયા પછી તેને ત્યાં સર્ચ ઓપરેશન ચલાવવામાં આવશે. તેના બેંક ખાતાઓ તપાસવામાં આવશે અને કાળા નાણાના કાયદા હેઠળ તેમના વિરૂદ્ધ કાર્યવાહી થશે. સૂત્રો અનુસાર આવકવેરા વિભાગે આ બાબતનો પ્રસ્તાવ તૈયાર કરી લીધો છે. કેન્દ્રીય પ્રત્યક્ષ કર બોર્ડ આ બાબતે ટૂંક સમયમાં નિર્દેશ બહાર પાડશે. સરકારે ઈન્કમ ટેક્ષ રીટર્ન ભરવાની મુદત એક મહિનો વધારી છે. હવે ૩૧ ઓગષ્ટ સુધી રીટર્ન ભરી શકાશે. આવક વેરા વિભાગના સૂત્રોનું કહેવું છે કે, આ વખતે ઈન્કમ ટેક્ષ રીટર્ન બાબતે સખ્તાઈ રાખવામાં આવશે. સરકાર ઈચ્છે છે કે આ વર્ષે રીટર્ન ભરનારની સંખ્યામાં ૫૦ લાખનો વધારો થાય. આના માટે સર્ચ ઓપરેશન કરીને એવા લોકોની ભાળ મેળવાઈ છે કે જેની આવક, આવક વેરામાં આવે છે પણ જે રીટર્ન નથી ભરતા, આવા લોકોને નોટીસ મોકલાઈ ચુકી છે. હવે આવક વેરા વિભાગ ૩૧ ઓગષ્ટ સુધી રાહ જોશે. જે લોકો ઈન્કમ ટેક્ષના દાયરામાં આવે છે અને સમય રીટર્ન નહી ભર્યા હોય તેમને બ્લેક લીસ્ટ કરવામાં આવશે. ઈન્કમટેક્ષ દાયરામાં આવતા લોકો ૩૧ ઓગષ્ટ પછી પણ રીટર્ન ભરી શકશે, પણ આવા લોકોને ડીસેમ્બર સુધીમાં ભરે તો ૫૦૦૦ અને ડીસેમ્બર પછી રીટર્ન ભરશે તો ૧૦,૦૦૦ રૂપિયા દંડ થશે. એસેસમેન્ટ પર પુરૂ થયા પછી રીટર્ન ભરવાની મનાઈ છે પણ બ્લેક લીસ્ટ થવાના કારણે તેમના પર આવક વેરા વિભાગની નજર રહેશે એટલે તેમના બેંક ખાતાઓ તપાસવામાં આવશે અને સર્ચ ઓપરેશન પણ થશે. આવક વેરા વિભાગના એક ઉચ્ચ અધિકારીએ કહ્યુ કે, ઘણા લોકો જાણી જોઈને મોડા રીટર્ન ભરે છે અને આવકની વિગતો આપવામાં ગરબડ કરે છે અને હવે એવા લોકો પર નજર રાખી રહ્યા છીએ. એમાં વેપારીઓથી માંડીને એવા પગારદારો છે જે પોતાની આવકના અન્ય સોર્સ છુપાવે છે. આવા લોકોને હવે છોડવામાં નહી આવે. એકવાર બ્લેક લીસ્ટમાં નામ આવવાનો મતલબ છે કે તેઓ અમારા રડારમાં રહેશે. આવક વેરા વિભાગે આવા લોકોનું લીસ્ટ બનાવ્યુ છે. જે સારો વેપાર તો કરે છે પણ આવક ઓછી દેખાડીને આવક વેરો નથી ભરતા. આવા લોકોની યાદી આવક વેરા વિભાગ પાસે છે. આવા લોકો માટે આ છેલ્લી તક અપાઈ છે કે તેઓ રીટર્ન ભરે નહીંતર પછી કાર્યવાહી માટે તૈયાર રહે. આ વખતે સરકારે આવક વેરા કલેકશનમાં ૨૦ થી ૨૫ ટકા વધારાનું લક્ષ્ય રાખ્યુ છે. સરકારનું માનવુ છે કે આ લક્ષ્ય તો જ હાંસલ થયા જો રીટર્ન ભરનારાઓની સંખ્યામાં વધારો થાય.