ICICI બેન્કે ફિક્સ ડિપોઝિટ પરના વ્યાજદરમાં વધારો કર્યો

રિઝર્વ બેન્ક દ્વારા મોનેટરી પોલિસીમાં નીતિગત વ્યાજદર વધારવાના પગલે આઇસીઆઇસીઆઇ બેન્કે પણ પોતાની ફિક્સ ડિપોઝિટ પરના વ્યાજદર વધાર્યા છે. આ વ્યાજદર વધારો ૧૪ ઓગસ્ટથી અમલી બની ગયો છે. એફડી પર વધેલા વ્યાજદરનો લાભ સામાન્ય ગ્રાહકો અને વરિષ્ઠ નાગરીકો બંનેને મળશે. આ અગાઉ એસબીઆઇ અને એચડીએફસી બેન્કે પણ એફડી પરના વ્યાજદર વધાર્યા હતા. આઇસીઆઇસીઆઇ બેન્કની રૂ. એક કરોડથી ઓછી રકમની ૧૮૫ દિવસથી ૨૮૯ દિવસની એફડી પર હવે ૬.૨૫ ટકાના બદલે ૬.૫૦ ટકા વ્યાજ મળશે. ૨૯૦ દિવસથી લઇને એક વર્ષ કરતા ઓછી સમયાવધિ ધરાવતી એફડી પર વ્યાજદર ૬.૫૦ ટકાથી વધીને ૬.૭૫ ટકા મળશે, જ્યારે એક વર્ષથી ૩૮૯ દિવસની એફડી પર ૬.૬૦ ટકા વ્યાજ હતું તે હવે વધીને ૬.૭૫ ટકા થઇ ગયું છે, જ્યારે પાંચ વર્ષની ટેક્સ સેવિંગ એફડી પર વ્યાજદર સાત ટકા હતો તે વધીને હવે ૭.૨૫ ટકા થઇ ગયો છે.