GST Impact: યુઝડ કાર માર્કેટમાં મંદી, ૩૦ ટકા ઘટયું વેચાણ

નવરાત્રિ અને દશેરા સિઝનમાં યુઝડ કાર માર્કેટમાં મંદી છવાયેલી રહી હતી. જૂની કાર્સની ખરીદી પર નવા ટેક્ષ માળખા અનુસાર નવી કાર્સની ખરીદી પર લાગતા ટેકસ કરતા વધારે ટેકસ ભરવો પડતો હોવાથી યુઝડ કારની ખરીદીમાં આ ફેસ્ટિવ સિઝનમાં ૩૦ ટકાનો ઘટાડો નોંધાયો છે. જે ઘણું ચિંતાજનક છે.
એક કાર ડિલરશીપના ઓફિશીયલ જૈનિશ પ્રજાપતિએ જણાવ્યું હતું કે, ‘પ્રી-ઓન્ડ કાર્સની ખરીદીમાં ગત વર્ષે નવરાત્રિની સિઝનમાં થયેલ વેચાણ કરતા ૩૦ ટકાનો ઘટાડો નોંધાયો છે. માર્કેટ અનુમાનો અનુસાર પહેલાં દર મહિને ૫,૫૦૦-૬૦૦૦ કાર્સ વેચાતી હતી જે હવે ઘટીને ૩,૫૦૦-૪,૦૦૦ કાર્સ સુધી જ રહી ગયું છે.’
ડિલર્સ અનુસાર GSTના વધુ દરોને કારણે આવું બન્યું છે. નવા ટેકસ માળખા અનુસાર જૂની કાર્સની ખરીદી પર ૨૮ ટકા ટેકસ પ્લસ સેસ લાગે છે જે કારણે ખરીદદારોનું બજેટ ખોરવાયું હોય તેવું લાગે છે. GST પહેલા યુઝડ કાર્સ પર ૧ ટકા VAT લાગતું હતું. જેની મર્યાદા ૨,૦૦૦ રુ. સુધીની હતી.
GSTને કારણે બાયર્સ વધારે સસ્તી કાર્સ તરફ વળશે તેવું ડિલર્સ માને છે. એવો એક વર્ગ છે જે દર ૨-૩ વર્ષે કાર ચેન્જ કરી દે છે અને આવા લોકો સર્ટિફાઈડ યુઝડ કાર્સ જ ખરીદવાનું પસંદ કરે છે. એક કાર ડિલરે જણાવ્યું હતું કે, ‘આવા કસ્ટમરોએ આ વખતે કારની ખરીદી કરવાનું ટાળ્યું હોય તેવું લાગી રહ્યું છે.’ GSTના માળખાને લઈને પ્રી-ઓન્ડ કાર્સની બાબતમાં ઘણી અસમંજસ છે. ડિલર્સને ખબર જ નથી કે તેમને ઈનવોઈસ અમાઉન્ટ પર ટેકસ ચૂકવવો પડશે કે માર્જિન પર. આ અંગ ચાર્ટર્ડ એકાઉન્ટન્ટ કરિમ લખાણીએ જણાવ્યું હતું કે, ‘યુઝડ કાર ડિલર્સને માર્જિન અમાઉન્ટ પર જ ટેકસ ચુકવવાનો રહેશે. જો કે આ અંગે સરકારે વધુ પ્રમાણમાં લોકોને જાણ કરવી જોઈએ.