દેના બેન્ક બોર્ડ ઓફ ડિરેક્ટર્સ દ્વારા મર્જર પ્રસ્તાવને મંજૂરી

જાહેર ક્ષેત્રની દેના બેન્કના બોર્ડ ઓફ ડાયરેક્ટરે બેન્ક ઓફ બરોડા અને વિજયા બેન્ક સાથે પોતાની બેન્કના મર્જરને મંજૂરી આપી દીધી છે. ગત સપ્તાહે સરકારે બેન્ક ઓફ બરોડા, વિજયા બેન્ક અને દેના બેન્કના મર્જરની જાહેરાત કરી હતી. મર્જર બાદ સંપત્તિ અને શાખાઓની દૃષ્ટિએ આ ત્રણેય બેન્કોના મર્જરથી આકાર પામનારી નવી બેન્ક દેશની બીજા નંબરની સૌથી મોટી બેન્ક હશે. દેના બેન્કે શેરબજારને જાણ કરી દીધી છે કે બોર્ડ ઓફ ડાયરેક્ટર્સની બેઠકમાં બેન્ક ઓફ બરોડા અને વિજયા બેન્ક સાથે અમારા બેન્કના મર્જરને ભલામણ કરવાનો નિર્ણય કરાયો છે. આ મર્જરથી એક એવી બેન્ક અસ્તિત્વમાં આવશે, જે બિઝનેસની દૃષ્ટિએ વૈશ્વિક બેન્કોને અનુરૂપ હશે અને દેશ તથા વિદેશમાં સ્પર્ધા કરવા માટે અસરકાર રીતે સક્ષમ બની રહેશે. દેના બેન્કે જણાવ્યું હતું કે અમારા બેન્કના બીઓબી તથા વિજયા બેન્ક સાથે મર્જર બાદ એક મજબૂત બેન્ક અસ્તિત્વમાં આવશે.