કેમેરાના બદલે નીકળ્યા ઇંટના ટુકડાઃ Amazon

ઋશિકેશના એક વિદ્યાર્થીને ઓનલાઈન શોપિંગ કરવાનું ઘણું મોઘું પડ્યું છે. વિદ્યાર્થીએ રૂ. 37450ની કિંમતના કેમેરાનો ઓર્ડર આપ્યો હતો, પરંતુ ડિલીવરીમાં તેને પેક કરેલા ઈંટના ટુકડા મળ્યા હતા. વિદ્યાર્થીએ આ અંગે કૈલાશ ગેટ પોલીસ સ્ટેશનમાં કંપની વિરુદ્ધ ફરિયાદ નોંધવવાની માગણી કરી છે. કૈલાશ ગેટ નજીકના મધુવન આશ્રમમાં રહેતા શુભમ ઝા ડિગ્રી કોલેજમાંથી બીએ કરી રહ્યો છે. તેના કહેવા પ્રમાણે તેણે ઈ-કોમર્સ કંપની Amazon પરથી 17મેના રોજ Canon AOS 200d 24.2 MP DSLR કેમેરાનો ઓર્ડર આપ્યો હતો. કેમેરાની કિંમત 37450 રૂપિયા હતી, જેની ચૂકવણી તેણે ઓનલાઈન કરી દીધી હતી. 20મેના રોજ જ્યારે Amazonની ડિલીવરી શુભમને મળી ત્યારે અંદરનો સામાન જોઈને શુભમ ચોંકી ગયો હતો. બાહરથી પેકેટને જોઈને લાગી રહ્યું ન હતું કે તેમાં કેમેરો હશે. આથી તેણે તેના મિત્રો સાથે પેકેટને ખોલતો વીડિયો બનાવ્યો હતો. પેકેટ ખોલ્યા પછી તેમાં તેને કેમેરાની જગ્યાએ એક ઈંટનો ટુકડો મળ્યો હતો. આ ઘટના પછી શુભમે પહેલા કોલ કરીને અને પછી ઓનલાઈન પોતાની ફરિયાદ નોંધાવી હતી. ફરિયાદ કર્યા પછી પણ કંપનીનો કોઈ રિપ્લાઈ નહીં આવતા તેણે પોલીસની મદદ માગી હતી. પોલીસ સ્ટેશનના ઈન્ચાર્જ સુજીત કુમારે જણાવ્યું હતું કે અમે આ અંગેની તપાસ કરી રહ્યા છે. તેની સાથે સાયબર સેલને પણ આ ઘટનાની જાણકારી આપી દીધી છે, તપાસ પૂરી થયા પછી જ કોઈ કાર્યવાહી કરવામાં આવશે.