સુરતઃ પતિ પત્ની વચ્ચે ઝઘડા થવા સામાન્ય બાબત છે. પરંતુ ક્યારેક આવા ઝઘડાઓ રૌદ્ર સ્વરૂપ ધારણ કરી લેતા હોય છે. આવા ઝઘડાઓમાં પતિઓ પત્નીઓને મારતા હોય એવું વધારે જ બનતું હોય છે. પરંતુ સુરતમાં ઉલટી ગંગા સમયા ઘટના પ્રકાશમાં આવી હતી. અહીં એક પત્નીએ પોતાના ભાઈ સાથે મળીને પતિને માર માર્યો હતો. અને ટેમ્પા પાછળ બાંધી ફિલ્મી સ્ટાઈલમાં ઘસેડ્યો હતો.
મળતી મહિતી પ્રમાણે સુરતના પલસાણા તાલુકાના કડોદરામાં કૃષ્ણાનગરની સત્યમ શિવમ સોસાયટીમાં રહેતા અને મૂળ મહારાષ્ટ્રના 32 વર્ષીય બાલાકૃષ્ણ રમેશભાઈ રાઠોડ મિલમાં કામ કરે છે. જેઓ પત્ની શીતલ સાથે દારૂ પી અવરનવર ઝગડો કરતો હતો. શુક્રવારે બપોરે 2 વાગ્યે બાલકૃષ્ણએ શીતલ અને સાસુ સાથે ઝઘડો કરતા
શીતલે દુર્ગાનગરમાં તેના ભાઈ અનિલને બોલાવ્યો હતો.
અનિલ ટેમ્પો ચલાવતો હોઈ પોતાનો ટેમ્પો લઈ આવ્યો હતો. અનિલ અને શીતલે બાલકૃષ્ણને માર માર્યો હતો, એટલેથી અટકવાને બદલે બાલકૃષ્ણને ટેમ્પાને પાછળ દોરડા વડે બાંધી 2000 ફૂટ સુધી રોડ ઉપર ઘસડી જતા અરેરાટી ફેલાઇ હતી.
ઘટના જોઈ સ્થાનિકો રોડ ઉપર દોડી આવ્યા હતા અને ટેમ્પો અટકાવીને બાલકૃષ્ણને છોડાવ્યો હતો. તેની હાલત ગંભીર હોવાથી બેભાન અવસ્થામાં સારવાર માટે સુરત સ્મીમેર હોસ્પિટલમાં ખસેડવામાં આવ્યો હતો. બીજી તરફ કડોદરા પોલીસે આ અંગે ફરિયાદ નોધવાની તજવીજ હાથ ધરી છે.
