રાજકોટઃ રાજકોટમાં એક શરમજનક ઘટના પ્રકાશમાં આવી છે. અહીં એક પુત્રએ પોતાની પત્ની સાથે મળીને માતાને ઢોર માર માર્યો હતો. ઢોર માર મારતા માતાને હોસ્પિટલમાં સારવાર માટે દાખલ કરવી પડી હતી. આ અંગે પોલીસે પુત્ર સામે ગુનો નોંધીને વધુ તપાસ હાથધરી હતી.
મળતી માહિતી પ્રમાણે રાજકોટ શહેરના જામનગર રોડ ઉપર આવેલા પરાપીપળીયા એકતા સોસાયટીમાં રહેતા પુષ્પાબેન પરમાર નામના વૃદ્ધાને તેમના જ પુત્ર રાજુ અને તેની પત્ની મોહિનીએ ઝઘડો કરી ધક્કો મારી માર માર્યો હોવાનો બનાવ સામે આવ્યો છે. સારવાર અર્થે પુષ્પાબેનને સરકારી હોસ્પિટલમાં ખસેડવામાં આવ્યા હતા.
સમગ્ર મામલે ગાંધીગ્રામ પોલીસના સ્ટાફને જાણ થતા તે હોસ્પિટલ ખાતે દોડી ગયો હતા. ત્યારે પૂછપરછમાં પોલીસને જાણવા મળ્યું હતું કે, પુષ્પાબેન સરકારી હોસ્પિટલમાં ફરજ બજાવતા હતા. તેઓ નિવૃત્ત થતા તેમને ગ્રેચ્યુટી સહિતના પૈસા આવ્યા હતા.
જે પૈસા પુષ્પાબેને પોતાના પુત્ર રાજુને નહીં પરંતુ પોતાની દીકરીઓને આપતા પુત્ર રાજુ ઉશ્કેરાઈ ગયો હતો. ત્યારે સમગ્ર મામલે ગાંધીગ્રામ પોલીસ દ્વારા કળિયુગી પુત્ર તેમજ તેની પત્ની વિરુદ્ધ કાયદેસરની કાર્યવાહી કરવામાં આવી રહી છે.
ઉલ્લેખનીય છે કે થોડા દિવસો પૂર્વે ગોંડલ શહેરમાં પોતાને માતા-પિતાને વારસાઈ મકાનના પૈસા બાબતે ધાક ધમકાવી માર માર્યા હોવાની ઘટના સામે આવી હતી. ગોંડલ શહેરના સ્ટેશન પ્લોટ શેરી નંબર 1 માં યાગ્નિક હનુમાનજી મંદિરની સામે રહેતા દિલીપ સિંહ સોલંકી નામના વૃદ્ધે પોતાના જ પુત્ર રાજદીપસિંહ સોલંકી વિરુદ્ધ પોલીસ ફરિયાદ નોંધાવી હતી. સમગ્ર મામલે ગોંડલ સિટી પોલીસ દ્વારા આઈપીસીની કલમ 323, 504 તેમજ જી પી એક્ટ ની કલમ 135 મુજબ ગુનો નોંધી વધુ તપાસ હાથ ધરી હતી.
