One Nation One Election: વન નેશન વન ઈલેક્શન લાગુ થશે તો ગુજરાત, રાજસ્થાન, MP-UP સહિત આ 22 રાજ્યોમાં બદલાઈ જશે રાજકીય રમત, જાણો કેવી રીતે
One Nation One Election: વડાપ્રધાન નરેન્દ્ર મોદીની આગેવાની હેઠળની કેબિનેટે ભારતમાં એક દેશ એક ચૂંટણીના પ્રસ્તાવને મંજૂરી આપી દીધી છે. પૂર્વ રાષ્ટ્રોપતિ રામનાથ કોવિંદના વડપણ હેઠળની સમિતિના પ્રસ્તાવને મંજૂરી મળ્યા બાદ તેનો ફાયદો કોને થશે તે પ્રશ્ન છે. એનડીએ સરકારમાં ભાજપ ઉપરાંત ચંદ્રબાબુ નાયડુની ટીડીપી, નીતિશ કુમારની જેડીયુ અને ચિરાગ પાસવાનની એલજેપી(આર) મોટી પાર્ટીઓ છે. જેડીયુ અને એલજેપી (આર) એક દેશ, એક ચૂંટણી માટે તૈયાર છે.
TDPએ આ અંગે કોઈ જવાબ આપ્યો નથી.
આ બિલને શિયાળુ સત્રમાં સંસદ દ્વારા પસાર કરવામાં આવશે, ત્યારબાદ તે કાયદો બની જશે અને તેની સાથે દેશમાં એકસાથે ચૂંટણી કરાવવાનો રસ્તો સાફ થઈ જશે. જોવન નેશન વન ઈલેક્શન લાગુ કરવામાં આવે છે અને 2029ની લોકસભા ચૂંટણીની સાથે તમામ વિધાનસભાની ચૂંટણીઓ પણ યોજાશે તો ચાલો જાણીએ કે કયા રાજ્યોમાં તેની અસર થશે.
આ રાજ્યોમાં ચૂંટણીમાં વિલંબ થશે
જો વન નેશન વન ઈલેક્શન લાગુ થશે તો રાજસ્થાન, મધ્યપ્રદેશ, છત્તીસગઢ, મિઝોરમ અને તેલંગાણામાં ચૂંટણીમાં વિલંબ થશે. માહિતી અને પ્રસારણ મંત્રી અશ્વિની વૈષ્ણવે કહ્યું કે પૂર્વ રાષ્ટ્રપતિ રામનાથ કોવિંદની આગેવાની હેઠળની સમિતિની ભલામણોને આગળ વધારવા માટે એક અમલીકરણ જૂથની રચના કરવામાં આવશે. આગામી કેટલાક મહિનામાં દેશભરના વિવિધ મંચો પર વિગતવાર ચર્ચા કરવામાં આવશે.
22 રાજ્યોમાં અગાઉથી ચૂંટણી યોજવી પડશે
વન કન્ટ્રી વન ઈલેક્શનના અમલ સાથે 22 રાજ્યો એવા છે જ્યાં સમય પહેલા ચૂંટણી યોજવી પડશે. વન નેશન વન ઈલેક્શનના અમલ પછી બિહાર, કર્ણાટક, દિલ્હી, ગોવા, આસામ, ગુજરાત, હરિયાણા, હિમાચલ પ્રદેશ, ઝારખંડ, કેરળ, મહારાષ્ટ્ર, મણિપુર, મેઘાલય, નાગાલેન્ડ, પુડુચેરી, પંજાબ, તમિલનાડુ, ત્રિપુરા, ઉત્તર પ્રદેશ, ઉત્તરાખંડ, જમ્મુ-કાશ્મીર અને પશ્ચિમ બંગાળમાં વહેલી ચૂંટણી યોજવી પડશે. એક દેશ એક ચૂંટણીના અમલથી ઓડિશા, આંધ્રપ્રદેશ, સિક્કિમ અને અરુણાચલ પ્રદેશ પર કોઈ અસર નહીં થાય. અહીં લોકસભા અને વિધાનસભાની ચૂંટણીઓ એકસાથે યોજાઈ રહી છે.
