મોરબીઃ ફાયરીંગ કરી હત્યાના ગુન્હામાં ફરાર તમામ છ આરોપીઓ લજાઈ નજીકથી ઝડપાયા

મોરબીના પંચાસર ગામે સોમવારે બપોરના સુમારે થયેલા ફાયરીંગમાં એકનું મોત જયારે બેને ઈજા પહોંચી હતી ત્યારે આ બનાવ મામલે ફાયરીંગ કરી હત્યાનિપજાવવાના ગુન્હામાં છ આરોપીઓ સામે તાલુકા પોલીસે ગુન્હો નોંધી વધુ તપાસ ચલાવી હતી જેમાં આજે તમામ આરોપીઓને લજાઈ નજીકથી ઝડપી લેવામાં આવ્યા છે.
પંચાસર ગામે ચકચારી ફાયરીંગ અને હત્યાના બનાવમાં ઈજાગ્રસ્ત પરાક્રમસિંહએ પોલીસમાં ફરિયાદ નોંધાવી છે જેમાં જણાવ્યું છે કે આરોપી સહદેવસિંહ લાલુભાઝાલા અને તેનો ભાઈ હિતેન્દ્રસિંહ લાલુભા ઝાલા તેમજ કાકો ભત્રીજો રાજ મહેન્દ્રસિંહ ઝાલા અને અરવિંદ ગંભીરસિંહ ઝાલા ઉપરાંત ભાજપ અગ્રણી નરેન્દ્રસિંહ નાથુભા ઝાલા અને તેના ભાઈ વિક્રમસિંહ નાથુભા ઝાલા (સદસ્ય તા.પં.) એ છ આરોપીઓએ રેતી ઉપાડવા બાબતે બોલાચાલી થઇ હોય જેમાં રાજ ઝાલા નામના આરોપીને મરણ જનાર સહદેવસિંહ ઝાલા સાથે ફોનમાં ગાળાગાળી થઇ હતી જે બાબતે કૌટુંબિક ભાઈની છત ભરાતી હોય તે સ્થળે આવી રાજ ઝાલાએ મરણ જનાર સહદેવસિંહ ઝાલાને ગોળીઓ ધરબી દઈને હત્યા કરી હતી તો ફરિયાદી અને મૃતક સહદેવસિંહ ઝાલાની પત્ની આ બનાવમાં ઈજાગ્રસ્ત હોય જે ફાયરીંગ અને હત્યા મામલે તપાસ ચલાવતી એલસીબી અને તાલુકા પોલીસની ટીમે આરોપીને ઝડપી લેવા ચક્રો ગતિમાન કર્યા હતા અને આજે લજાઈ નજીકથી પસાર થતી સ્વીફ્ટ કાર નં જીજે ૦૩ બીએન ૨૩૦૦ માં આરોપીઓ સવાર હોય જે તમામ છ આરોપીની અટકાયત કરવામાં આવી હતી અને સ્વીફટ કાર કબજે લેવામાં આવી હતી અને તમામ આરોપીની પોલીસે વધુ પૂછપરછ ચલાવી છે. એલસીબી અને તાલુકા પોલીસની સંયુક્ત ટીમે બાતમીને આધારે વોચ ગોઠવી હતી અને આરોપીઓને ઝડપી લેવામાં સફળતા મળી હતી જોકે ફાયરીંગમાં વપરાયેલા હથિયાર કબજે કરવાના બાકી હોય તેમજ આરોપીઓ હત્યા બાદ ક્યાં ક્યાં ગયા હતા તે હકીકત મેળવવા આરોપીઓને રિમાન્ડની માંગણી સાથે અદાલતમાં રજુ કરવા પણ પોલીસે તજવીજ આદરી છે.