Pahalgam Attack પહેલગામ હુમલા પર ભારતની કડક કાર્યવાહી, પાકિસ્તાની નાગરિકોના વિઝા રદ કરાશે: અમિત શાહનો આદેશ
Pahalgam Attack 22 એપ્રિલના રોજ જમ્મુ અને કાશ્મીરના પહેલગામ વિસ્તારમાં થયેલા ઘાતક આતંકવાદી હુમલાના પગલે ભારત સરકારે પાકિસ્તાન સામે મહત્ત્વપૂર્ણ અને તીવ્ર પગલાં લેવાનું નક્કી કર્યું છે. કેન્દ્રીય ગૃહમંત્રી અમિત શાહે શુક્રવારે દેશના તમામ મુખ્યમંત્રીઓ સાથે વાતચીત કરી અને રાજ્યમાં રહેતા તમામ પાકિસ્તાની નાગરિકોની તાત્કાલિક ઓળખ કરી તેમની વિગત કેન્દ્ર સરકારને મોકલવા આદેશ આપ્યો છે.
સરકારી સૂત્રોના જણાવ્યા મુજબ, આ સૂચના દેશભરમાં વસવાટ કરતા પાકિસ્તાની નાગરિકોના વિઝા રદ કરવાની પ્રક્રિયાનો ભાગ છે. અમિત શાહે સ્પષ્ટ રીતે કહ્યું કે આ કામગીરી સર્વોચ્ચ પ્રાથમિકતાની હોવી જોઈએ અને કોઈ વિલંબ સહન કરાશે નહીં.
સિંધુ જળ સંધી પર નિર્ણય અને કૂટનીતિમાં તણાવ
આ આતંકવાદી હુમલામાં 25 ભારતીય યાત્રાળુઓ અને 1 નેપાળી નાગરિકના મોત થયા હતા. આ ઘટના બાદ ભારતે આતંકવાદી સંગઠન TRF અને તેના પર પાકિસ્તાનના સંભવિત આધાર અંગે ગંભીર આક્ષેપ કર્યા છે. જવાબરૂપે, ભારતે 1960ની સિંધુ જળ સંધિને સ્થગિત કરી દીધી છે, તેમજ અટારી-વાઘા સરહદને તાત્કાલિક અસરથી બંધ કરી દેવામાં આવી છે. વધુમાં, પાકિસ્તાની નાગરિકો માટે આપવામાં આવેલ તમામ સામાન્ય વિઝા 27 એપ્રિલથી રદ કરવામાં આવશે, જ્યારે મેડિકલ વિઝા માટેની મર્યાદા 29 એપ્રિલ સુધી રાખવામાં આવી છે.
કાયદો અને વ્યવસ્થા જાળવવા અપીલ
ગૃહમંત્રીએ રાજ્યોને પાકિસ્તાની નાગરિકોની ઓળખમાં ઝડપી કામગીરી કરવા અને કાયદો-વ્યવસ્થાની સ્થિતિ યથાવત્ જાળવવા જણાવ્યું છે. તેમણે આ કામગીરીમાં રાજ્યો અને કેન્દ્ર વચ્ચે પુરતો સંકલન હોવા પર ભાર મૂક્યો છે.
પાકિસ્તાનની પ્રતિક્રિયા તીવ્ર
ભારતના આ પગલાંના જવાબમાં પાકિસ્તાને પોતાનું હવાઈ ક્ષેત્ર ભારતીય વિમાનો માટે બંધ કરી દીધું છે અને તમામ વેપાર સંબંધો પણ રોકી દીધા છે. આ તણાવના માહોલમાં બંને દેશો વચ્ચે રાજદ્વારી સંપર્કો પણ ઘટી રહ્યા છે.
