કોલકાત્તાઃ આગામી દિવસોમાં પશ્ચિમ બંગાળમાં વિધાનસભાની ચૂંટણી યોજાવા જઈ રહી છે ત્યારે અહીં ભારતીય જનતા પાર્ટી અને તૃણમૂલ કોંગ્રેસ વચ્ચે જોરદાર ટક્કર થવા જઈ રહી છે ત્યારે ચૂંટણી પ્રચાર પણ પોતાની ચરમ સીમા ઉપર છે. આવી સ્થિતિમાં રાજકીય પક્ષોના નેતાઓ અને કાર્યકરો ઉપર હુમલો થવો સ્વાભાવીક બની જાય છે.
ત્યારે ઉત્તરી 24 પરગણાના જગદલ ખાતે ક્રુડ બોમ્બ વડે હુમલો કરવામાં આવ્યો હતો જેમાં 3 લોકો ઘાયલ થયા છે. હુમલો થયો તે સ્થળ ભાજપના સાંસદ અર્જુન સિંહના ઘરથી સાવ નજીક આવેલું છે જેથી ભાજપ ચૂંટણી પંચ સમક્ષ આ હુમલાની ફરિયાદ કરશે
બૈરકપુરથી ભાજપના સાંસદ અર્જુન સિંહે જણાવ્યું કે, 3 લોકોએ તેમના સાથીદારો સાથે મળીને આશરે 15 સ્થળોએ બોમ્બ ફેંક્યા હતા અને પોલીસ દ્વારા લગાવવામાં સીસીટીવી કેમેરા પણ તોડી નાખ્યા હતા. પોલીસ અધિકારી એસીપી એપી ચૌધરીએ આ હુમલામાં એક બાળક સહિત 3 લોકો ઘાયલ થયા હોવાની માહિતી આપી હતી.
ભાજપના નેતા કૈલાશ વિજયવર્ગીયે આ હુમલાના અનુસંધાને ટીએમસી ‘હિંસાના રાજકારણનો પર્યાય’ છે તે અર્થનું નિવેદન આપ્યું હતું. તેમણે જણાવ્યું કે, આચારસંહિતા લાગુ થયા બાદ પણ ગુંડાઓ દ્વારા બોમ્બમારો અને ગોળીઓનો વરસાદ ચાલુ છે. ચૂંટણી પંચે આ ઘટનાને ચેતવણી તરીકે લેવી જોઈએ નહીં તો મતદાન શાંતિપૂર્ણ રીતે થશે કે નહીં તે પણ શંકા છે.