ઉપલેટાઃ ૧૮૬૨૫ મેટ્રિક ટન રેતીના જથ્થાનો સ્ટોક ઝડપાયો જુઓ વીડિયો

ઉપલેટા તાલુકાના વેણુ નદીનાં કાંઠે આવેલા ગધેથડ ગામથી નાગવદર ગામ તરફ જતા રસ્તામાં ગેરકાયદેસર રેતીના સટ્ટા હોવા અંગેની ધોરાજી પ્રાંત અધિકારી તુષાર જોષીને મળેલ ચોક્કસ બાતમી મુજબ ગધેથડ ગામની સીમમાં પુષ્કળ પ્રમાણમાં ગેરકાયદેસર રેતીના ૨૫ જેટલા સટ્ટાઓમાં અંદાજે ૧૮૬૨૫ મેટ્રિક ટન રેતીના જથ્થાનો સ્ટોક કરી બારોબાર વહેંચતા હોવાની બાતમીના આધારે ધોરાજી પ્રાંત અધિકારીએ ઉપલેટા મામલતદાર તેમજ સ્ટાફને સાથે રાખી બપોરે ત્રણ વાગ્યાની આસપાસ આકસ્મિક ચકાસણી કરતા બે ટ્રેક્ટરો પૈકી એક ગેરકાયદેસર રીતે વગર રોયલ્ટીએ રેતીનું વહન થતું હોવાથી રેતીચોરી સબબ કાયદેસર કાર્યવાહી કરી પોલીસ સ્ટેશનને સોંપવામાં આવેલ. ત્યારબાદ ઉપરોક્ત અધિકારીઓ ટીમ સાથે નાગવદર ગામે વેણુ નદીમાં તપાસ કરતા ત્યાં આગળ ગેરકાયદેસર રેતીનું ખનન થતું હોવાનું માલુમ પડેલ અને અધિકારીશ્રી સાથેની ટીમ નદીમાં જતા નદીમાં નાસભાગ મચી જવા પામી હતી. તેમજ નદીમાં સ્થળ ઉપર એક મોટરસાયકલ, બે ટ્રેક્ટરો, બે લોડર મશીનથી ખનન કરવામાં આવતું હતું. સરકારી ગાડીઓ જોઈને એ લોકો ભાગી ગયા હતા. જ્યારે એક ટ્રક, એક મોટરસાયકલ સ્થળ પરથી મળેલ  તેમજ ગધેથડ અને નાગવદર ગામે વેણુ નદીના કાંઠા ઉપર તેમજ ગામની આજુબાજુમાં જુદા જુદા સ્થળો પર તપાસ કરતા અંદાજે ૨૫ જેટલા રેતીના  (ઢગલાઓ)માં દરોડા પાડવામાં આવ્યા હતા. સ્થળ ઉપર વાહનો છોડીને નાસી ગયેલા લોકો ઉપર પોલીસ દ્વારા આગળની કાર્યવાહી ચાલુ છે. રેતીચોરી બાબતે મદદનીશ ભુસ્તરશાસ્ત્રીશ્રી, ખાણ ખનીજ શાખા, કલેક્ટર કચેરી, રાજકોટ ની ટીમ દ્વારા સ્થળ ઉપર કાર્યવાહી ચાલુ છે. સ્થળ પર કોઈ વસ્તુમાં ફેરફાર ના થાય એ માટે પૂરતો પોલીસ બંદોબસ્ત ગોઠવવામાં આવ્યો છે.