Surat: સુરત જિલ્લાના મહુવા તા. પં. સભ્યએ કચેરીના કેમ્પસમાં જ TDOને તમાચા મારતા ચકચાર …..
TDOને તમાચા મારનાર તા .પ ના સભ્ય પરિમલ પટેલને પોલીસ સ્ટેશનમાં આવ્યા બાદ અચાનક જ પથરીનો દુખાવો ઉપડ્યો…..?
Surat જિલ્લાના મહુવા તાલુકા પંચાયતની શેખપુર બેઠક પરથી વિજેતા થયેલા સભ્ય પરિમલ પટેલે શુક્રવારે સાંજે મહુવા તાલુકા વિકાસ અધિકારી પી.સી મહાલાને ગાળો આપી ગાલ પર તમાચા મારી શરીરે ઢીક મુક્કીનો માર મારતા ભારે ચકચાર વચ્ચે મામલો મહુવા પોલીસ મથકે પહોંચ્યો હતો.
જિલ્લા પોલીસ ની મહુવા પોલીસે ટીડીઓની ફરિયાદ આધારે
તાલુકા પંચાયતના સભ્ય વિરુદ્ધ ગુનો નોંધાયો છે. શેખપુર સીટ પરથી ચૂંટાયેલ તાલુકા પંચાયત સભ્ય પરિમલ પટેલ ફરી એકવાર વિવાદમાં આવ્યા છે. તાલુકા પંચાયત સભ્ય પરિમલ પરેશભાઈ પટેલે શુક્રવારના રોજ સાંજે તાલુકા પંચાયત કચેરીના કેમ્પસમાં મહુવા તાલુકા વિકાસ અધિકારી પી.સી.મહાલાને તમાચા મારી દેતા મામલો પોલીસ મથકે પહોંચ્યો છે.
Surat જિલ્લાના મહુવા પોલીસને તાલુકા વિકાસ અધિકારી દ્વારા ફરિયાદ આપતા જણાવ્યું હતું કે તેઓ પોતાનુ સરકારી વાહન સુમો લઈ કુમકોતર ગામેથી સરકારનો જાહેર કાર્યક્રમ પતાવી પરત મહુવા આવી રહ્યા હતા. તે દરમિયાન વાંસકુઈ ગામની સીમમાં તાલુકા પંચાયત સદસ્ય પરિમલ પટેલે પોતાની અલ્ટો કાર (GJ-19-M-8272) પુરઝડપે હંકારી લાવી સરકારી વાહન આગળ અચાનક તેમની અલ્ટો ગાડી આડી મૂકી દઈ અવરોધ ઉભો કર્યો હતો અને સરકારી વાહનમાં સવાર મુકેશભાઈ રાઠોડને ફોન કરી તમે ગાડી કેમ ઉભી રાખેલ નથી. મારે જાણવું હતુ કે ગાડીમાં કોણ કોણ છે. તુ ટીડીઓ સાહેબ સાથે ફરે છે ને તને પણ જોઈ લઈશ અને તારી નોકરી પણ જશે અને તારા પોટલાં પણ વાળી દઈશ તેવી ધમકી આપી હતી.
ત્યારબાદ મહુવા તાલુકા વિકાસ અધિકારી
પી.સી.મહાલા મહુવા તાલુકા પંચાયત કચેરી પર આવ્યા હતા અને ત્યાંથી નાયબ જિલ્લા વિકાસ અધિકારી ડી.એમ.મહાકાળ સાથે મહુવા ગામમાં જિલ્લા પંચાયત સ્વભંડોળના આવાસની ચકાસણી માટે સરકારી કામે જવા નીકળેલ તે દરમિયાન સભ્ય પરિમલ પટેલ ત્યાં આવી અચાનક ઉશ્કેરાય જઈ તમામ સ્ટાફની સામે તાલુકા પંચાયત કેમ્પસમાં ટીડીઓને ગાળો આપી ચાર પાંચ થપ્પડ ગાલ ઉપર મારી ગમે તેમ શરીરે ઢીક મુક્કીનો માર મારી જાનથી મારી નાખવાની ધમકી આપતા ચકચાર મચી જવા પામી હતી. ઘટના અંગે મહુવા ટીડીઓએ મહુવા પોલીસને જાણ કરી ફરિયાદ આપતા પોલીસે તાલુકા પંચાયત સભ્ય પરિમલ પટેલ વિરુદ્ધ ગુનો નોંધી તેની ધરપકડ કરી કાયદેસરની કાર્યવાહી હાથ ધરી હતી.
મહુવા પોલીસ મથકે આવ્યા બાદ તાલુકા પંચાયત સભ્ય પરિમલ પટેલને અચાનક પથરીનો દુખાવો ઉપડ્યો હતો. દુખાવા સાથે પરિમલ પટેલને મહુવાની રેફરલ હોસ્પિટલમાં સારવાર અર્થે ખસેડવામાં આવ્યો હતો. સારવાર બાદ દુખાવો દૂર થતાં પરિમલ પટેલને ફરી પોલીસ મથકે લાવી પોલીસ દ્વારા વધુ પૂછપરછ હાથ ધરાઇ હોવાનું જાણવા મળ્યું છે ..?
