જુનાગઢઃ તાઉતે વાવાઝોડાની અસર સૌરાષ્ટ્ર સહિત સમગ્ર ગુજરાતમાં જોવા મળી હતી. તાઉતે એ સૌરાષ્ટ્રમાં સૌથી વધારે તબાહી મચાવી છે. આ સાથે જ સૌરાષ્ટ્રની વિશ્વપ્રસિધ્ધ કેસર કેરીના પાકને તોઉતે વાવાઝોડાએ ખેદાન મેદાન કરી નાંખ્યો છે. આ પહેલા સતત પખવાડિયા સુધી કમોસમી વરસાદથી પાકને આંશિક નુકસાન થયું હતો ત્યારે આજે 100થી 150 કિ.મી.ની ઝડપે ફૂંકાયેલા પવન સાથે વરસાદથી ખેડૂતોને કેસર કેરી ઉપરાંત અન્ય ઉનાળુ પાકોને કરોડો રૂપિયાનું નુકસાન ગયું છે.
કેરીના વેરી બનીને ત્રાટકેલ વાવાઝોડાએ તલાલા પંથકમાં 13827 હેક્ટર જમીનમાં પથરાયેલા આશરે 15 લાખથી વધુ આંબાના વૃક્ષોને ઝપેટમાં લીધા હતા અને અનેક આંબામાં કેરીઓ ખરી પડી તો ક્યાંક આખા આંબા જ ઉખડી ગયા હતા. આશરે કરોડોની કેરીને નુકસાન થયાના તલાલાથી અહેવાલ છે.
મોટાભાગના આંબાની ડાળીઓ વાવાઝોડાના વિનાશક પવનની ઝપેટમાં ચીરાઈ ગઈ હતી, તૂટી ગઈ હતી. આવું નુકસાન ગીર સોમનાથ જિલ્લો, જુનાગઢ જિલ્લો, અમરેલી જિલ્લો વગેરેમાં પણ વ્યાપક રીતે થયું છે.
જુનાગઢ ઉપરાંત વિસાવદર, મેંદરડા, માળીયા હાટીના, વંથલી, પંથકમાં કેરીનું વ્યાપક ઉત્પાદન થાય છે જ્યાં અગાઉ વારંવાર કમોસમી વરસાદ વરસતો રહ્યો હતો અને આજે વાવાઝોડાએ દાટ વાળી દીધો હતો. જુનાગઢથી અહેવાલ મૂજબ વર્ષમાં કેસર કેરીનો પાક એક જ વાર લેવાય છે અને તે સીઝન ટાણે જ વાવાઝોડુ આવતા કેરીનો સોથ વળી ગયો છે.
કેરી ઉપરાંત દરિયાકાંઠે આવેલ નારિયેળીના ઝાડ પણ ધરાશાયી થયા હતા તો કેળાના વૃક્ષોને પણ વ્યાપક નુકસાન થયાનું જણાવાયું છે. જ્યારે આ સમયમાં વવાતા અડદ, મગ, તલ, બાજરા સહિતના પાકને પણ નુકશાન થયું છે. ખેડૂતોએ વ્યાપક નુકસાનના પગલે તાકીદે સર્વે કરીને સરકાર સહાય આપે તેવી ભારપૂર્વક માંગણી કરી છે. ગીર સોમનાથ, વિસાવદર, જુનાગઢ, માળિયા હાટીના, અમરેલી પંથકમાં વધુ નુકસાન.
