GIPCL Bomb Threat: વડોદરાની GIPCL કંપનીને મળ્યો બોમ્બ ધમકીનો ઇમેઇલ, ત્રણ કલાકની તપાસ બાદ કોઈ શંકાસ્પદ વસ્તુ મળી નહીં
GIPCL Bomb Threat: વડોદરામાં ધનોરા ગામ પાસે આવેલી ગુજરાત ઇન્ડસ્ટ્રીઝ પાવર કંપની લિમિટેડ (GIPCL)માં આજે તણાવભર્યું વાતાવરણ જોવા મળ્યું, જ્યારે કંપનીના મેનેજિંગ ડિરેક્ટરને એક બોમ્બની ધમકી ભરેલો ઇમેઇલ મળ્યો. ધમકી મળતાની સાથે જ સમગ્ર સુરક્ષા તંત્ર સતર્ક બની ગયું અને જુદી-જુદી તપાસ એજન્સીઓ ઘટના સ્થળે દોડી ગઈ.
જાણ થતા તાત્કાલિક કાર્યવાહીની શરુઆત
ધમકી મળ્યા બાદ કંપની તરફથી પોલીસને જાણ કરાતા SOG, ક્રાઇમ બ્રાંચ, બોમ્બ ડિસ્પોઝલ સ્કવોડ (BDDS) અને સ્થાનિક પોલીસ ઘટના સ્થળે પહોંચી ગઈ હતી. ત્રણ કલાકથી વધુ સમય સુધી કંપનીના કોર વિભાગો સહિત સમગ્ર કેમ્પસમાં તલાશી હાથ ધરવામાં આવી હતી. જોકે તપાસ દરમ્યાન કોઈપણ વિસ્ફોટક વસ્તુ કે શંકાસ્પદ સામગ્રી મળી ન આવતા થોડોક હાશકારો આવ્યો હતો.
ઇમેઇલ મોકલનારની ઓળખ માટે તપાસ ચાલુ
કંપનીના સિક્યુરિટી ઇન્ચાર્જે અવસરમાં જવાહરનગર પોલીસ સ્ટેશનમાં જાણવાજોગ ફરિયાદ નોંધાવી છે. પોલીસ વિભાગે મળેલા ઇમેઇલના IP એડ્રેસ અને અન્ય ટેક્નિકલ વિગતના આધારે ઇમેઇલ કયા સ્થાન પરથી મોકલાયો હતો અને કોણે મોકલ્યો તેનો પીછો કરવા માટે ડિજિટલ તપાસ શરૂ કરી છે.
ડીસીપીનું નિવેદન
આ મામલે ડીસીપી જે.સી. કોઠિયાએ જણાવ્યું કે, “GIPCLના એમડીને મળેલા ઇમેઇલમાં સ્પષ્ટ રીતે બોમ્બ મૂક્યાની વાત જણાવવામાં આવી હતી. પગલાં રૂપે તમામ જરૂરી સુરક્ષા એજન્સીઓને સંલગ્ન કરીને તાત્કાલિક તપાસ હાથ ધરવામાં આવી હતી. જોકે હાલ સુધીમાં કોઈપણ પ્રકારનો ખતરો શોધાયો નથી, પરંતુ ઇમેઇલના સૂત્રોને શોધવા માટે આગળની તપાસ ચાલુ છે.”
કર્મચારીઓમાં અશાંતિ, પરંતુ હવે રાહત
આ ઘટનાને પગલે કંપનીના અંદરના વર્તુળમાં થોડીવાર માટે ભયનું માહોલ સર્જાયો હતો, પણ તપાસમાં કંઈ ખતરનાક નહીં મળતાં કર્મચારીઓમાં અંશતઃ શાંતિ આવી છે. હાલમાં સમગ્ર મામલે પોલીસ ઉચ્ચ સતરે તપાસ કરી રહી છે ..
