Gandhinagar News: રાષ્ટ્રપતિ દ્રૌપદી મુર્મુની અધ્યક્ષતામાં NFSU નો ત્રીજો દીક્ષાંત સમારોહ યોજાયો
રાષ્ટ્રપતિ શ્રીમતી દ્રૌપદી મુર્મુ :- દેશમાં ફોરેન્સિક વિજ્ઞાન પર આધારિત ઇકોસિસ્ટમને મજબૂત બનાવવા માટે મિશન મોડ પર કામ કરવામાં આવી રહ્યું
ગુના પર નિયંત્રણ, ગુનેગારોમાં સજાનો ડર અને નાગરિકોનો ઝડપી ન્યાય મેળવવાનો વિશ્વાસ એ સુશાસનની સાચી ઓળખ
ગાંધીનગર, શુક્રવાર
Gandhinagar News: નેશનલ ફોરેન્સિક સાયન્સ યુનિવર્સિટી (NFSU) નો ત્રીજો દીક્ષાંત સમારોહ શુક્રવારે ગાંધીનગરમાં રાષ્ટ્રપતિ દ્રૌપદી મુર્મુની અધ્યક્ષતામાં યોજાયો. આ પ્રસંગે ગુજરાતના રાજ્યપાલ આચાર્ય દેવવ્રત, મુખ્યમંત્રી ભૂપેન્દ્ર પટેલ અને ગૃહ રાજ્યમંત્રી હર્ષ સંઘવી ઉપસ્થિત રહ્યા હતા.
આ દીક્ષાંત સમારોહમાં રાષ્ટ્રપતિએ 1562 વિદ્યાર્થીઓને વિવિધ અભ્યાસક્રમોની ડિગ્રી એનાયત કરી, જેમાં 12 પીએચડી, 1 એલએલડી, અને વિવિધ ડિપ્લોમા, બેચલર, પોસ્ટગ્રેજ્યુએટ તેમજ પોસ્ટગ્રેજ્યુએટ ડિપ્લોમાની ડિગ્રીનો સમાવેશ થાય છે. તેજસ્વી વિદ્યાર્થીઓને સુવર્ણ ચંદ્રકો પણ એનાયત કરવામાં આવ્યા.
વિદ્યાર્થીઓને અભિનંદન પાઠવતાં રાષ્ટ્રપતિ દ્રૌપદી મુર્મુએ ભારતના ન્યાયતંત્રમાં ફોરેન્સિક વિજ્ઞાનની મહત્ત્વપૂર્ણ ભૂમિકા પર પ્રકાશ નાખ્યો. તેમણે વિશેષત: ન્યાયની ગતિ ઝડપી બનાવવામાં NFSU ની ભૂમિકાને રેખાંકિત કરી અને જણાવ્યું કે ગુનાની તપાસમાં ફોરેન્સિક સાબિતીઓનો ઉપયોગ એ સુશાસનની સાબિતી છે.
વિશ્વભરમાં ફોરેન્સિક સાયન્સની વધતી માંગ અંગે તેમણે ઉલ્લેખ કર્યો કે 15 દેશોના 70 થી વધુ વિદેશી વિદ્યાર્થીઓએ પણ NFSU માંથી ડિગ્રી પ્રાપ્ત કરી છે. NFSU દ્વારા 30,000 થી વધુ નાણા, ન્યાયતંત્ર અને સુરક્ષા ક્ષેત્રના અધિકારીઓને તાલીમ આપવામાં આવી છે.
1 જુલાઈ, 2024 થી લાગુ થયેલા નવા ફોજદારી કાયદાઓના સંદર્ભમાં, ફોરેન્સિક નિષ્ણાતોની તાત્કાલિક જરૂરિયાતને ધ્યાનમાં રાખવામાં આવી છે. આ કાયદાઓ ગુનાની તપાસમાં ફોરેન્સિક સાબિતીઓના ઉપયોગને વધુ મહત્વ આપે છે.
રાજ્યપાલ આચાર્ય દેવવ્રતે વિદ્યાર્થીઓને તેમની કારકિર્દી માટે પ્રેરણા આપી અને રાષ્ટ્રસેવામાં તેમની જવાબદારી પર ભાર મૂક્યો. તેમણે શિક્ષણને ફક્ત વ્યક્તિગત લાભ માટે નહીં, પરંતુ સમાજ અને રાષ્ટ્રના હિત માટે ઉપયોગી ગણાવ્યું.
મુખ્યમંત્રી ભૂપેન્દ્ર પટેલે NFSU ના યોગદાનની પ્રશંસા કરી અને જણાવ્યું કે પ્રધાનમંત્રી નરેન્દ્ર મોદીના દૃષ્ટિ અને માર્ગદર્શન હેઠળ, NFSU વિશ્વભરમાં એક પ્રતિષ્ઠિત સંસ્થા બની છે. તેમણે વિદ્યાર્થીઓને ધીરજ અને પ્રામાણિકતાથી ન્યાય માટે કામ કરવાની સલાહ આપી.
NFSU ના વાઇસ ચાન્સેલર, પદ્મશ્રી ડૉ. જે.એમ. વ્યાસે યુનિવર્સિટીના વિકાસ અને વૈશ્વિક સ્તરે તેની લોકપ્રિયતા અંગે ચર્ચા કરી. તેમણે જણાવ્યું કે NFSU માં હાલમાં 72 થી વધુ અભ્યાસક્રમો છે અને 7500 થી વધુ વિદ્યાર્થીઓ શિક્ષણ લઈ રહ્યા છે. યુનિવર્સિટીએ રાષ્ટ્રીય તેમજ આંતરરાષ્ટ્રીય સ્તરે પોતાનું મહત્વ સ્થાપિત કર્યું છે.
આ પ્રસંગે, યુનાઇટેડ કિંગડમ, ઓસ્ટ્રેલિયા, તાઇવાન, રવાન્ડા, ઝિમ્બાબ્વે અને પોલેન્ડ સહિત અનેક દેશોના મહાનુભાવો હાજર રહ્યા હતા. વિદ્યાર્થીઓ અને તેમના પરિવારો માટે આ દીક્ષાંત સમારોહ ગૌરવસભર ક્ષણ બની હતી, જ્યાં ભારતની ફોરેન્સિક વિજ્ઞાન ક્ષેત્રે પ્રગતિની ઝલક જોવા મળી.
