લ્યો, કેન્દ્ર પછી રાજ્યના કર્મચારીઓને આ ખતરનાક કામ કરવું પડશે, ફરજીયાત છે…

ગાંધીનગર — ગુજરાત સરકારના કર્મચારીઓને આદેશ કરવામાં આવ્યો છે કે સેફ્ટિ વિના ગાંધીનગરના સચિવાલયમાં આવવું નહીં. કર્મચારીઓએ કેટલાક નિયમો પાળવાના રહેશે જેમાં માસ્ક પહેરવું, સોશ્યલ ડિસ્ટન્સિંગ રાખવું તેમજ સેનિટાઇઝરનો ઉપયોગ કરવો. એ ઉપરાંત હવે નવો ફતવો આવ્યો છે.

સરકારના તમામ કર્મચારીઓએ ભારત સરકારની આરોગ્ય સેતુ એપ્લિકેશન ડાઉનલોડ કરવી પડશે. આ એપ્લિકેશન ફરજીયાત છે. જે કર્મચારીએ કરી નહીં હોય તેને ઓફિસ કે સચિવાલયમાં પ્રવેશ મળશે નહીં. કેન્દ્ર સરકારના કર્મચારીઓને આરોગ્ય સેતુ એપ્લિકેશન ફરજીયાત ડાઉનલોડ કરવાની સૂચના આપ્યા પછી ગુજરાત સરકારે તેના કર્મચારીઓને આવી સૂચના આપી છે.

રાજ્યના સામાન્ય વહીવટી વિભાગના અગ્રસચિવ કમલ દાયાનીએ કહ્યું છે કે સરકારમાં ફરજ બજાવતા તમામ કર્મચારીઓ અને અધિકારીઓએ આરોગ્ય સેતુ એપ્લિકેશન ડાઉનલોડ કરવાની રહેશે. આ એપ્લિકેશનમાં સ્વમૂલ્યાંકન એટલે કે તેઓ ક્યા ઝોનમાં છે તે ચેક કરીને સચિવાલય આવવાનું રહેશે. ગાંધીનગરમાં કોરોના વાયરસનું સંક્રમણ વધી જતાં આ નિર્ણય લેવામાં આવ્યો છે.

કમલ દાયાણીએ કહ્યું છે કે સરકારી સેવામાં હોય તેવા અને આઉટ સોર્સિંગથી રાખવામાં આવ્યા છે તેવા તમામ કર્મચારીઓએ આરોગ્ય સેતુ એપ્લિકેશન ડાઉનલોડ કરવાની રહેશે. કચેરીએ આવતા પહેલાં પોતાની સ્થિતિની ચકાસણી કરવાની રહેશે. એપ્લિકેશન પર સુરક્ષિત અથવા તો ઓછું જોખમ દર્શાવવામાં આવે ત્યારે જ કર્મચારીએ ઓફિસે આવવા નિકળવું જોઇએ.

તમામ અધિકારી અને કર્મચારીએ બ્લૂટૂથ ઓપન કરીને આસપાસના વિસ્તારોમાં સંક્રમિત કેસો હોય તો તેનું વિશ્લેષણ જોઇ લેવું જોઇએ. થોડુંક અથવા વધુ જોખમ દર્શાવવામાં આવે તો તેવા અધિકારી કે કર્મચારીએ ઓફિસે આવવાનું નથી. 14 દિવસ સુધી અથવા એપમાં તેમની સ્થિતિ સુરક્ષિત અથવા તો ઓછું જોખમ ન દર્શાવે ત્યાં સુધી પોતાને અન્ય વ્યક્તિના સંપર્કમાંથી દૂર રાખવાના રહેશે.

જો કોઇ કર્મચારીએ આરોગ્ય સેતુ એપ્લિકેશન ડાઉનલોડ ન કરી હોય તો તે ચકાસવાની જવાબદારી જે તે વિભાગના વડાની રહેશે. સામાન્ય વહીવટ વિભાગે કહ્યું છે કે આ એપ્લિકેશન ફરજીયાત છે તેથી જેમણે ડાઉનલોડ ન કરી હોય તેમણે ડાઉનલોડ કરી દેવી જોઇએ.