ખુલ્લા આકાશમાં ઉડતા વિમાનમાં પાયલટની તબિયત અચાનક બગડે તો શું થશે? મામલો બગડી જ જશે. આવો જ એક કિસ્સો અમેરિકામાં સામે આવ્યો છે. એક પેસેન્જર ફ્લાઇટ હવામાં ઉડી રહી હતી, જ્યારે તેના પાયલટની તબિયત બગડી. જેના કારણે તેને તાત્કાલિક મેડિકલ ઈમરજન્સી માટે કોકપીટમાંથી બહાર કાઢવો પડ્યો. આ દરમિયાન પ્લેનમાં મુસાફરી કરી રહેલા એક મુસાફરે આગળ આવીને મોરચો સંભાળ્યો. તે મુસાફરે વિમાન ઓપરેટ કરવા માટે પાયલટને મદદ કરી.
અહેવાલ મુજબ, સાઉથવેસ્ટ એરલાઈન્સના એક વિમાને લાસ વેગાસથી કોલંબસ, ઓહાયો માટે ઉડાન ભરી હતી. ટેકઓફના થોડા સમય બાદ પાયલટની તબિયત અચાનક બગડી ગઈ. મેડિકલ ઈમરજન્સીના સંજોગોમાં પ્લેનને લાસ વેગાસમાં પાછું લેન્ડ કરવાનું કહેવામાં આવ્યું. પરિસ્થિતિ વધુ વણસે તે પહેલા વિમાનમાં સવાર એક મુસાફર વિમાનને સંભાળવા આગળ આવ્યો. તે પોતે એક પ્રોફેશનલ પાયલોટ હતો અને અન્ય એરલાઇન કંપનીમાં કામ કરતો હતો. તેણે કોકપીટમાં આવીને એર ટ્રાફિક કંટ્રોલનો સંપર્ક કર્યો. સાથે જ એરક્રાફ્ટના કો-પાયલોટે ફ્લાઇટ પર નિયંત્રણ મેળવી લીધું. થોડા સમય પછી, ફ્લાઈટ 6013 એ સુરક્ષિત લેન્ડિંગ કર્યું. સાઉથવેસ્ટ એરલાઇન્સના પ્રવક્તા ક્રિસ પેરીએ જણાવ્યું કે અન્ય એરલાઇનના પાઇલટ ફ્લાઇટ ડેકમાં પ્રવેશ્યા અને રેડિયો સંચારમાં મદદ કરી. જ્યારે અમારા સાઉથવેસ્ટ પાયલોટે પ્લેન ઉડાડ્યું.
વિમાન લગભગ 1 કલાક 17 મિનિટ સુધી હવામાં રહ્યું
આ દરમિયાન એક મહિલા પેસેન્જરે બીમાર પાયલટની સારવાર કરી. તે એક પ્રોફેશનલ નર્સ હતી. લેન્ડિંગ બાદ પાયલટને હોસ્પિટલમાં દાખલ કરવામાં આવ્યો. હાલ મામલાની તપાસના આદેશ આપવામાં આવ્યા છે.
ગયા વર્ષે પણ એક પેસેન્જરે પ્લેનનું લેન્ડિંગ કરાવ્યું હતું
ઉલ્લેખનીય છે કે, આવો જ એક કિસ્સો ગયા વર્ષે મે મહિનામાં જોવા મળ્યો હતો. ત્યારે અમેરિકાના ફ્લોરિડામાં એર ટ્રાફિક કંટ્રોલરની મદદથી એક મુસાફરે પ્લેનને લેન્ડ કરાવ્યું હતું. વાસ્તવમાં ફ્લાઇટ દરમિયાન પાઇલટની તબિયત લથડી હતી. તે બેહોશ થઈ ગયો હતો, ત્યારબાદ પેસેન્જર વિમાનને કંટ્રોલ કરવા લાગ્યો. તેની પાસે વિમાન ઉડાવવાનો કોઈ અનુભવ નહોતો. પરંતુ તે સેસના કારવાંનામના વિમાનને સુરક્ષિત રીતે લેન્ડ કરાવવામાં તે સફળ રહ્યો હતો.
