અમદાવાદ-ગાંધીનગર સહિત રાજ્યભરમાં કાળઝાળ ગરમી

ગુજરાતભરમાં આકરા ઉનાાળાની શરુઆત થઈ ગઈ છે. મોટાભાગના શહેરોમાં મહત્તમ પારો 36થી 41 ડિગ્રી સુધીનો રહ્યો હતો. IMDના ડેટા અનુસાર, બુધવારના રોજ અમદાવાદ-ગાંધીનગર સહિતના ગુજરાતના 9 શહેરોમાં ગરમીનો પારો 40 ડિગ્રી સેલ્સિયસથી ઉપર પહોંચ્યો હતો. બુધવારના રોજ સૌથી વધારે ગરમી સુરેન્દ્રનગરમાં પડી હતી. અહીં મહત્તમ તાપમાન 42 ડિગ્રી નોંધાયુ હતું. ત્યારપછી 41.6 ડિગ્રી સાથે ભુજ શહેર બીજા સ્થાને હતું. જો અમદાવાદની વાત કરીએ તો અમદાવાદમાં દિવસે તાપમાન 40.4 ડિગ્રી સુધી પહોંચ્યુ હતું, જે સામાન્ય કરતાં 2.8 ડિગ્રી વધારે છે. લઘુત્તમ તાપમાન 19 ડિગ્રી નોંધાયુ હતું, જે તામાન્ય કરતાં 2.4 ડિગ્રી ઓછું છે.બુધવારના રોજ શહેરમાં ભેજનું પ્રમાણ 48%થી 16% સુધી હતું. IMD અનુસાર, ગુરુવારના દિવસે પણ શહેરમાં પારો 40 ડિગ્રીથી ઉપર જવાની શક્યતા છે. આકરા તાપ અને ગરમીને કારણે અમદાવાદીઓએ બપોરે ઘરની બહાર નીકળવાનું ટાળી રહ્યા છે. દિવસે ગરમ પવનો ફુંયાદ છે, જ્યારે સાંજે ગરમીમાં થોડી રાહત મળે છે. ગાંધીનગરની વાત કરીએ તો, અહીં મહત્તમ તાપમાન 40.6 ડિગ્રી નોંધાયુ હતુ. નિષ્ણાંતોના જણાવ્યા અનુસાર, આગામી દિવસોમાં ગરમીમાં થોડી રાહત મળી શકે છે. પરંતુ ગુજરાતમાં હીટ વેવની આગાહી પણ કરવામાં આવી છે. ઉલ્લેખનીય છે કે IMD દ્વારા પણ 31, માર્ચ અને 1, એપ્રિલના રોજ સૌરાષ્ટ્ર અને કચ્છમાં હીટવેવની વોર્નિંગ આપવામાં આવી છે.