મૂડીઝ ઇન્વેસ્ટર્સ સર્વિસે બુધવારે 2023 માટે ભારતની આર્થિક વૃદ્ધિનું અનુમાન અગાઉના 4.8 ટકાથી વધારીને 5.5 ટકા કર્યું છે. બજેટમાં મૂડી ખર્ચમાં તીવ્ર વધારો અને સારી આર્થિક સ્થિતિને ધ્યાનમાં રાખીને આ વધારો કરવામાં આવ્યો છે. જો કે, મૂડીઝે 2022 માટે ભારતની વૃદ્ધિનું અનુમાન 7 ટકાથી ઘટાડીને 6.8 ટકા કર્યું છે.
ઉન્નત આર્થિક વૃદ્ધિ અનુમાન
મૂડીઝે ગ્લોબલ બ્રોડ આઉટલુક 2023-24ના ફેબ્રુઆરી અપડેટમાં યુએસ, કેનેડા, યુરોપ, ભારત, રશિયા, મેક્સિકો અને તુર્કી સહિત અનેક G20 અર્થતંત્રો માટે વૃદ્ધિની આગાહી કરી છે. આ વધારો વર્ષ 2022 ના મજબૂત અંતને કારણે કરવામાં આવ્યો છે.
મૂડીઝે માહિતી આપી હતી
મૂડીઝે કહ્યું, ‘ભારતના કિસ્સામાં, નાણાકીય વર્ષ 2023-24ના બજેટમાં મૂડી ખર્ચ માટે ફાળવણીમાં તીવ્ર વધારો થયો છે. ગયા નાણાકીય વર્ષમાં આ આંકડો રૂ. 7,500 અબજથી વધીને રૂ. 10,000 અબજ થયો છે. રેટિંગ એજન્સીએ કહ્યું કે આવી સ્થિતિમાં 2023માં વાસ્તવિક જીડીપી વૃદ્ધિ 0.70 ટકા વધારે એટલે કે 5.5 ટકા રહી શકે છે. 2024માં તે 6.5 ટકા રહેવાનો અંદાજ છે.
2023 માં મજબૂત પ્રદર્શન
તેણે વધુમાં જણાવ્યું હતું કે 2022ના બીજા ભાગમાં મજબૂત આંકડાઓ આશા આપે છે કે 2023માં પ્રદર્શન મજબૂત રહેશે. મૂડીઝે જણાવ્યું હતું કે ભારત સહિત અનેક મોટા ઉભરતા બજારના દેશોમાં આર્થિક વૃદ્ધિ ગત વર્ષની અપેક્ષા કરતાં વધુ મજબૂત રહી છે.
