દારૂની પરમીટ શોપ્સ શરૂ કરવા જાણો ક્યા સિનિયર વકીલે માગણી કરી…

ગાંધીનગર – ગુજરાતમાં દારૂની પરમીટ શોપ શરૂ કરવાની માગણીઓ લાયસન્સદારો કરે તે સ્વાભાવિક છે પરંતુ રાજ્યના એક સિનિયર વકીલે દારૂની શોપ્સ શરૂ કરવાની મંજૂરી માગી છે. રાજ્યમાં પરમીટનો દારૂ પીતા હોય તેવી 62000 જેટલા વ્યક્તિઓ છે, જેમને ફાઇવસ્ટાર હોટલો કે દારૂની સ્પેશ્યલ શોપ્સમાંથી પરમીટનો દારૂ મળતો હોય છે.

ગુજરાત હાઇકોર્ટના સિનિયર વકીલ યતિન ઓઝાએ રાજ્યના મુખ્યસચિવ અનિલ મુકિમ સમક્ષ વિનંતી કરી છે કે રાજ્યમાં દારૂની શોપ કે જે મુખ્યત્વે હોટલોમાં આવેલી છે તેને શરૂ કરવી જોઇએ. તેમણે કહ્યું છે કે કોરોના સંક્રમણ સમયે તબીબો પણ દારૂ પીવાનું સૂચન કરવા હોય છે. અન્ય રાજ્યોમાં દારૂની શોપ્સ ખુલી ચૂકી છે ત્યારે ગુજરાતે હજી આ શોપ્સ બંધ રાખી છે.

તેમણે કહ્યું છે કે ગુજરાત એવું રાજ્ય છે કે ડોક્ટરોની પેનલ દ્વારા ભલામણ કરવામાં આવે છે તેમને દારૂ પીવીની છૂટ મળે છે. ગુજરાતમાં લોકડાઉન 4.0 ચાલી રહ્યું છે. સરકાર જે જાહેરનામાં બહાર પાડે છે તેમાં દારૂની શોપ્સનો કોઇ ઉલ્લેખ કરવામાં આવતો નથી. રાજ્ય સરકાર આ મુદ્દે મૌન છે.

યતિન ઓઝાએ કહ્યું કે જે નાગરિકોને ખુદ ડોક્ટર કહે છે કે તમારે દારૂનું સેવન કરવું જરૂરી છે ત્યારે સરકારે પણ તેના માટે જાહેરનામું બહાર પાડવું જોઇએ. ખુદ ડોક્ટરો જ ખાસ પરવાનગી આપે છે. તેમણે મુખ્યસચિવને રજૂઆત કરી કહ્યું છે કે તેઓ દારૂની શોપ્સ ગુજરાતમાં ખૂલે તેની મંજૂરી આપશે તેવો મને વિશ્વાસ છે.