10,00,000 લોકો તો ઠીક 10,000 લોકોને પણ એક લાખની લોન નહીં મળી શકે, જાણો કારણ?

ગાંધીનગર – ગુજરાતમાં મુખ્યમંત્રી વિજય રૂપાણીએ જાહેર કરેલી એક લાખની સસ્તી લોનનો લાભ રાજ્યમાં કેટલા લોકો લઇ શકશે તે મોટો સવાલ છે. સરકારે દાવો કર્યો હતો કે બે ટકાના વ્યાજની એક લાખની લોન 10 લાખ અસરગ્રસ્તોને મળશે પરંતુ સહકારી બેન્કોના તેવર જોતાં 10 હજાર લોકોને પણ લોન મળી શકે તેમ નથી.

જેનો ડર હતો તે થઇ રહ્યું છે. લોકો ફોર્મ જમા કરાવવા જાય છે ત્યારે તેમને ડોક્યુમેન્ટ અધુરાં છે કહીને પાછા કાઢવામાં આવે છે. પહેલાં તો એ પૂછવામાં આવે છે કે આ બેન્કમાં ખાતું છે કે કેમ… તમારા જે ગેરન્ટર છે તેનું પણ ખાતુ આ બેન્કમાં હોવું જોઇએ… બઘું કમ્પલેટ થાય એટલે કેલ્યુલેટ કરીને કહેવામાં આવે છે કે તમને માત્ર 25000 રૂપિયાની લોન મળી શકે છે.

ઉલ્લેખનીય છે કે આ લોનના ફોર્મ લેવા માટે સહકારી બેન્કો, જિલ્લા બેન્કો અને સહકારી ક્રેડિટ સોસાયટીઓની શાખાઓ પર કિલોમીટર જેટલી લાંબી લાઇનો લાગતી જોઇને નાયબ મુખ્યમંત્રી નીતિન પટેલે સ્પષ્ટતા કરી હતી કે લોકો તડકામાં આરોગ્ય બગડે તે રીતે લાઇનોમાં ઉભા ન રહે, કારણ કે જે લોકો એલિજીબલ થવાના છે તેમને તો લોન મળવાની છે પરંતુ જે લોકો એલિજીબલ નથી તેઓ ધક્કા ખાય નહીં.

નાયબ મુખ્યમંત્રીએ કહ્યું હતું કે બઘાંને આ લોન નહીં મળે. જે લોકોના ધંધા-રોજગાર ચોપટ થયેલા છે અને જેમની પાસે દુકાન કે ધંધાને લગતા ડોક્યુમેન્ટ્સ છે તે લોકો ફોર્મ ભરી શકશે. આ લોન માટે બે જામીન બેન્કને આપવાના રહેશે, કારણ કે બેન્કને પણ પોતાના રૂપિયાની ચિંતા હોય છે. તારણ કોઇએ આપવાનું નથી પરંતુ જામીનગીરી અવશ્ય આપવી પડશે.

લોકડાઉનમાં જેમના ધંધા ચોપટ થઇ ગયા છે તેવા નાના દુકાનદારો, રિક્ષાચાલકો, લારી-ગલ્લાવાળા અને સ્થાયી જગ્યા ધરાવતા વેપારીઓ ફરીથી બેઠાં થાય તે માટે એક લાખ રૂપિયાની લોન માત્ર બે ટકાના વ્યાજે આપવાની થાય છે, જેમાં ગુજરાત સરકાર છ ટકાનું વ્યાજ ચૂકવશે. જો કે બેન્કોના આકરા નિયમોથી લોન લેવા જતા નાના વેપારીઓ નિરાશ વદને પાછા ફરે છે.

લોનના ફોર્મમાં લોન લેવા ઇચ્છુક લોકોએ તેમના ઘર અને ધંધાના સ્થળના તમામ પ્રકારના ડોક્યુમેન્ટ આપવાના રહેશે. આ સાથે બે ગેરંટર પણ હશે. જો લોન લેનાર વ્યક્તિ લોનના હપ્તા ન ભરે તો બેન્ક ગેરંટર પાસેથી હપ્તા કે લોન વસૂલ કરી શકે તેવી વ્યવસ્થા ગોઠવવામાં આવશે જે ગેરંટરને માન્ય નહીં હોય. મોટાભાગના કિસ્સામાં લોન ઇચ્છુકને ગેરંટર મળતા નથી.