કોરોનામાં એમ્બ્યુલન્સનો ઉપયોગ દર્દીઓ માટે કરવાનો હોય છે પરંતુ જાણો શું પ્રવૃત્તિ થાય છે…

ગાંધીનગર — ગુજરાતમાં લોકડાઉન દરમ્યાન લોકોની સેવા માટે રોકાયેલી એમ્બ્યુલન્સ દ્વારા જીવન જરૂરિયાતની ચીજો વહેંચવાની જગ્યાએ બીજી વસ્તુઓ વહેંચી છે. આવી 23 જેટલી એમ્બ્યુલન્સને જપ્ત કરી લેવામાં આવી છે.

એમ્બ્યુલન્સનો ઉપયોગ દર્દીની સારવાર માટે કરવામાં આવતો હોય છે પરંતુ કેટલાક સંચાલકો દ્વારા તેનો દુરપયોગ થતો હોવાનું પોલીસને જાણમાં આવતા તેમની સામે પગલાં લેવામાં આવ્યા હોવાનું રાજ્ય પોલીસ વડા શિવાનંદ ઝા એ કહ્યું છે. બીજી તરફ કરફ્યુ ભંગના અમદાવાદ, સુરત અને રાજકોટમાં 213 ગુનાઓ નોંધીને પોલીસે 239 લોકોની ધરપકડ કરી છે.

લોકડાઉનમાં માર્ગો પર ફરી રહેલા વાહનો પૈકી દ્વીચક્રી વાહનો માટે 500 રૂપિયા અને ફોરવ્હિલર વાહનો માટે 1000 રૂપિયાનો દંડ વસૂલવામાં આવે છે. પોલીસે જપ્ત કરેલા વાહનો છોડાવવા માટે આ દંડ આપવો પડે છે.

લોકડાઉન દરમિયાન રાજ્ય સરકાર દ્વારા આવશ્યક સેવાઓ માટે કેટલીક છૂટછાટ આપવામાં આવી છે ત્યારે આવશ્યક સેવાઓ સાથે સંકળાયેલા કેટલાક વ્યક્તિઓ દ્વારા માણસોની હેરાફેરી કરવામાં આવી રહી હોવાની ગંભીર બાબતો પોલીસના ધ્યાને આવી હતી. જેના આધારે આવી સેવાઓ સાથે સંકળાયેલા વાહનો ઉપર પણ પોલીસે સતત વોચ રાખી છે.

રાજ્યમાં એમ્બ્યુલન્સ મારફતે માણસોની હેરાફેરી કરી આવશ્યક સેવાનો દુરુપયોગ કરતી 23 એમ્બ્યુલન્સ જપ્ત કરવામાં આવી છે. જે તમામ સામે કડક કાયદેસરની કાર્યવાહી કરવામાં આવી છે.

રાજ્યમાં લોકડાઉનની અમલવારી માટે હવે પોલીસ દ્વારા ટેક્નોલોજીનો મહત્તમ ઉપયોગ કરી વાહનોના નંબર પ્લેટને આધારે રસ્તા ઉપર વારંવાર ફરતા દેખાતા નાગરિકોને શોધી કાઢવા માટે ઓટોમેટિક નંબર પ્લેટ રિકગ્નાઇઝેશન (એ.એન.પી.આર.) સોફ્ટવેરની મદદથી બિનજરૂરી ફરતા વાહનચાલકોની યાદી તૈયાર કરી તે તમામ સામે ગુનો દાખલ કરવા સુધીની કડક કાર્યવાહી હાથ ધરવામાં આવી રહી છે.

શહેરી વિસ્તારોમાં વાહનોના નંબર આધારે ટ્રેકિંગ માટે એ.એન.પી.આર. સોફ્ટવેરની મદદથી વાહન પર નજર રાખી 190 ગુના દાખલ કરી જરૂરી કડક કાર્યવાહી હાથ ધરવામાં આવી છે. એટલું જ નહિ, 360 ડિગ્રી એરિયા કવર કરતાં કેમેરાથી સુસજ્જ પોલીસની વાન ‘પ્રહરી’ દ્વારા લોકડાઉન પર ચાંપતી નજર રાખવામાં આવી રહી છે. પ્રહરી આધારે અત્યાર સુધી 152 ગુનાઓ દાખલ કરવામાં આવ્યા છે. તે ઉપરાંત પોલીસ પેટ્રોલિંગમાં ફરતી ગાડીઓમાં તૈનાત વીડિયોગ્રાફર દ્વારા કરાયેલા રેકોર્ડિંગ થકી 226 ગુના નોંધવામાં આવ્યા છે.