ગુજરાતમાં લોકલ ઇન્વેસ્ટમેન્ટ ડાઉન, એફડીઆઇ વધીને ત્રણ ગણું થયાનો દાવો….

ગાંધીનગર – ગુજરાત સરકારે દાવો કર્યો છે કે એક વર્ષમાં રાજ્યએ 42976 કરોડ રૂપિયાનું ફોરેન ડાયરેક્ટ ઇન્વેસ્ટમેન્ટ મેળવ્યું છે. કેન્દ્ર સરકારના ડિપાર્ટમેન્ટ ઓફ પ્રમોશન ઓફ ઇન્ડસ્ટ્રી એન્ડ ઇન્ટરનેશનલ ટ્રેડના અહેવાલમાં ગુજરાત દેશભરમાં અગ્રસ્થાને આવ્યું હોવાનો દાવો કરવામાં આવ્યો છે.

દેશના એવરેજ એફડીઆઇ ગ્રોથથી 20 ગણું એફડીઆઇ ગુજરાતમાં આવ્યું છે. ભારતના બીજાક્રમના રાજ્ય કર્ણાટક કરતાં આઠ ગણું એફડીઆઇ ગુજરાતે મેળવ્યું છે. સરકારે દાવો કર્યો છે કે દેશમાં થયેલા ઇન્ડસ્ટ્રીયલ એન્ટરપ્રેન્યોર્સ મેમોરેન્ડમમાં 51 ટકા ફાળો એકલા ગુજરાતનો છે.

સરકારના આંકડા કહે છે કે એપ્રિલ થી સપ્ટેમ્બર 2019 સુધી 262 વિદેશી કંપનીઓના ઓપરેશન ગુજરાતમાં શરૂ થયાં છે. મુખ્યમંત્રી વિજય રૂપાણી કહે છે કે કોરોનાની સ્થિતિ પછી રાજ્યમાં નવા આવનારા ઉદ્યોગોને અનેક પ્રોત્સાહનો આપી ગુજરાતને ગ્લોબલ ડેસ્ટિનેશન ફોર ઇન્વેસ્ટમેન્ટ બનાવવામાં આવશે, જો કે કોરોના સંક્રમણ અને લોકડાઉનના કારણે ગુજરાતના ખુદના ઉદ્યોગોની સ્થિતિ કથળી છે.

રિપોર્ટમાં જણાવાયું છે કે 2018-19ના વર્ષમાં ગુજરાતમાં 12618 કરોડનું સીધું વિદેશી મૂડીરોકાણ આવ્યું હતું જે 2019-20માં વધીને 42976 કરોડ થયું છે. અન્ય રાજ્યોમાં કર્ણાટક-34 ટકા અને દિલ્હી-11 ટકા FDI મેળવી શકયા છે, જ્યારે મહારાષ્ટ્રમાં એફડીઆઇ ઘટીને ત્રણ ટકા માઇનસ (નેગેટીવ) તેમજ તામિલનાડુમાં આઠ ટકા માઇનસ (નેગેટીવ) આવ્યું છે.