ઉમેશપાલ હત્યા કેસમાં ઉત્તર પ્રદેશ પોલીસને મોટી સફળતા મળી છે. પોલીસની STF ટીમે હત્યાકાંડની આગેવાની કરી રહેલા અતીકના પુત્ર અસદને એન્કાઉન્ટરમાં ઠાર માર્યો છે. આ સાથે પોલીસે અન્ય એક શૂટર ગુલામ મોહમ્મદને પણ મારી નાખ્યો છે. અસદના એન્કાઉન્ટરના સમાચાર સામે આવ્યા ત્યારે માફિયા અતીક અહેમદ પ્રયાગરાજ કોર્ટમાં હતો. એન્કાઉન્ટરના સમાચાર સાંભળીને તે ધ્રુસકે-ધ્રુસકે રડવા લાગ્યો. આ સાથે તેનો ભાઈ અશરફ પણ ત્યાં જ રડવા લાગ્યો.
ઉમેશપાલ હત્યા કેસમાં રજૂ કરવામાં આવ્યો હતો
જણાવી દઈએ કે ઉમેશપાલ હત્યા કેસમાં અતીક અહેમદ અને તેના ભાઈ અશરફને આજે પ્રયાગરાજ સીજેએમ કોર્ટમાં રજૂ કરવામાં આવ્યા હતા. જ્યાં UP STFએ પૂછપરછ માટે કોર્ટમાં બંનેના 14 દિવસના રિમાન્ડ માંગ્યા હતા પરંતુ કોર્ટે 7 દિવસના રિમાન્ડ આપ્યા છે. બંનેને કોર્ટ પરિસરમાં જ અસદના એન્કાઉન્ટરના સમાચાર મળ્યા. સમાચાર સાંભળીને બંને રડવા લાગ્યા. અગાઉ અતીકે એન્કાઉન્ટરની આશંકા વ્યક્ત કરી હતી.
અસદે ઉમેશ પાલ હત્યા કેસનું નેતૃત્વ કર્યું હતું
તમને જણાવી દઈએ કે બસપા ધારાસભ્ય રાજુ પાલની હત્યા કેસના મુખ્ય સાક્ષી ઉમેશ પાલ અને તેના બે સુરક્ષાકર્મીઓની આ વર્ષે 24 ફેબ્રુઆરીના રોજ પ્રયાગરાજના ધુમાનગંજ વિસ્તારમાં ગોળી મારીને હત્યા કરવામાં આવી હતી. અસદ આ હત્યાકાંડનું નેતૃત્વ કરી રહ્યો હતો. પોલીસ તેને છેલ્લા દોઢ મહિનાથી શોધી રહી હતી, પરંતુ તે પોલીસને ચકમો આપીને ફરાર થઈ ગયો હતો. આજે આખરે પોલીસને તેની ઝાંસીમાં હાજરી અંગેનો સંકેત મળ્યો અને એસટીએફની ટીમે તેનું એન્કાઉન્ટર કરી દીધું. મળતી માહિતી મુજબ, પોલીસને માર્યા ગયેલા અસદ અને ગુલામ પાસેથી વિદેશી અત્યાધુનિક હથિયારો પણ મળી આવ્યા છે.
ઉમેશ પાલ હત્યા કેસમાં ફરાર માફિયા અતીક અહેમદના પુત્ર અસદ અને શૂટર ગુલામના એન્કાઉન્ટર પર મુખ્યમંત્રી યોગી આદિત્યનાથે પ્રતિક્રિયા આપી છે. તેમણે કાયદો અને વ્યવસ્થાને લઈને મોટી બેઠક બોલાવી છે.
