વર્ષ 2023 ભારતીય ક્રિકેટ ટીમ માટે મિશ્ર વર્ષ રહ્યું. બે વખત ટીમ ઈન્ડિયા આઈસીસી ટ્રોફી જીતવાની નજીક આવી હતી, જોકે બંને વખત ચૂકી ગઈ હતી. આ સિવાય ટીમ ઈન્ડિયાની કેપ્ટનશીપને લઈને સતત હંગામો ચાલી રહ્યો હતો. ભારતીય ક્રિકેટ ટીમ હાલમાં સંક્રમણના તબક્કામાંથી પસાર થઈ રહી છે. ટેસ્ટ ક્રિકેટમાં ચેતેશ્વર પુજારા અને અજિંક્ય રહાણેથી આગળ વધીને ટીમ ઈન્ડિયા યશસ્વી જયસ્વાલ અને શુભમન ગિલ જેવી યુવા પ્રતિભાઓને તક આપી રહી હોય તેવું લાગી રહ્યું છે. ટીમ ઈન્ડિયાના પૂર્વ ક્રિકેટર સુનીલ ગાવસ્કર અને ઈરફાન પઠાણે જણાવ્યું છે કે 2024માં ટીમ ઈન્ડિયાને કઈ મુશ્કેલીઓનો સામનો કરવો પડશે અને તેનો કેવી રીતે સામનો કરવો જોઈએ. ગાવસ્કરનું માનવું છે કે ટીમ ઈન્ડિયામાં નવી પ્રતિભાઓને તક મળવી જોઈએ, પરંતુ તેની સાથે સાથે અનુભવી ખેલાડીઓનું પણ હોવું જરૂરી છે.
ગાવસ્કરે સ્ટાર સ્પોર્ટ્સ પર કહ્યું, ‘તમને ટીમમાં યુવા પ્રતિભાની સાથે સાથે અનુભવની પણ જરૂર છે અને તેથી બંનેને સાથે લેવું ખૂબ જ મહત્વપૂર્ણ છે અને ભારતીય ક્રિકેટ ટીમે 2024માં આના પર ધ્યાન કેન્દ્રિત કરવું જોઈએ.’ જ્યારે ઈરફાન પઠાણનું માનવું છે કે ટીમ ઈન્ડિયાએ પેસ એટેક પર કામ કરવું જોઈએ અને યુવા ફાસ્ટ બોલરો પર ધ્યાન આપવું જોઈએ.
વર્તમાન સાઉથ આફ્રિકા ટેસ્ટ સિરીઝનું ઉદાહરણ આપતા ઈરફાન પઠાણે કહ્યું કે મોહમ્મદ શમીની ટીમમાં અભાવ છે અને જો જસપ્રિત બુમરાહ ઈજાગ્રસ્ત થઈ જાય તો તેના સ્તરનો ઝડપી બોલર મળવો મુશ્કેલ છે. અત્યારે જરૂર છે કે છ-સાત ફાસ્ટ બોલરો તૈયાર કરવા જોઈએ. આ સિવાય ઈરફાન પઠાણે પણ કેપ્ટનશિપ વિશે વાત કરી હતી. તેણે કહ્યું કે વિરાટ કોહલી અને રોહિત શર્માની કેપ્ટન્સીમાં ટીમ ઈન્ડિયાએ સારું પ્રદર્શન કર્યું છે, પરંતુ આગળ નેતૃત્વ કોને મળવું જોઈએ? આ વિચારવા જેવી વાત હશે. આ સિવાય તેણે કહ્યું કે બે-ત્રણ નેતાઓને તૈયાર કરવા અને તેમની ફિટનેસ પર નજર રાખવી ટીમ ઈન્ડિયા માટે મહત્વપૂર્ણ રહેશે.
