રાજકોટઃ અત્યારે સમગ્ર રાજ્યમાં કોરોના વાયરસે હાહાકાર મચાવ્યો છે ત્યારે લોકો હજી પણ સુધરવાનું નામ નથી લઈ રહ્યાં. રાજ્યના મોટા શહેરોમાં રાત્રિકર્ફ્યૂ અમલી છે ત્યારે રાજકોટમાં કર્ફ્યૂ દરમિયાન યુવતીનો જાહેરમાં ડાન્સ કરતો વીડિયો વાયરલ થયો હતો. રાજકોટના મહિલા કૉલેજ ચોક અંડરબ્રિજ ક્રાઇમ બ્રાન્ચની ઓફિસ નજીક એક યુવતીએ પોતાનો ડાન્સિંગ વીડિયો બનાવ્યો હોવાનું સામે આવ્યું છે. જોકે, ગણતરીની કલાકોમાં વીડિયો પોતાનો હોવાનો દાવો કરતી યુવતીએ વીડિયો ડિલીટ કરવાની ફરજ પડી હોવાનું જાણવા મળી રહ્યું છે.
રાજકોટ શહેરમાં વધુ એક વખત રાત્રિ કર્ફ્યૂનો મુદ્દો ચર્ચામાં આવ્યો છે. રાજકોટ શહેરના હાર્દ સમા ગણાતા મહિલા કૉલેજ અંડરબ્રિજ પાસે આવેલા સર્વિસ રોડ પર એક યુવતીએ પોતાનો ડાન્સિંગ વીડિયો બનાવવામાં આવ્યો હોવાનું સામે આવ્યું છે.
વીડિયો બનાવ્યા બાદ યુવતીએ તેને પોતાના ઇન્સ્ટાગ્રામ એકાઉન્ટ પર અપલોડ કર્યો હતો. બાદમાં પોલીસના ડરે વીડિયો ડિલીટ કરી નાખ્યો હોવાનું ચર્ચાઇ રહ્યું છે. બીજી તરફ આ વીડિયો જ્યારે વાયરલ થયો ત્યારે (RealPrisha_) નામના એકાઉન્ટમાંથી એક બાદ એક કૉમેન્ટ કરી યુવતી પોતાના બચાવ માટે પક્ષ રાખવાના સતત પ્રયત્નો કરી રહી છે.
યુવતીના ઇન્સ્ટાગ્રામ એકાઉન્ટમાં ગણતરીની કલાકો પહેલા જ ડો. યાજ્ઞિક રોડનો પણ એક વીડિયો અપલોડ કરવામાં આવ્યો છે. યુવતીએ સોશિયલ મીડિયામાં કોમેન્ટ કરી પોતાનો બચાવ કરતા કહ્યું છે કે, “હું કોઈ પૈસાવાળાની દીકરી નથી. માંડ માંડ કરી લાઇફ જીવું છું. કમાવવા વાળી એક જ છું. એમાં પણ આ બે વર્ષથી અમારા જેવા ઇવેન્ટવાળા પાસે તો કંઈ જ નથી.”
આ સમગ્ર મામલે રાજકોટ પોલીસ ટેક્નિકલ અને હ્યુમન સર્વેલન્સના આધારે રાત્રિ કર્ફ્યૂ દરમિયાન વીડિયો બનાવનાર યુવતીને ક્યારે ઝડપી પાડી તેના વિરૂદ્ધ કાયદેસરની કાર્યવાહી કરે છે તે જોવું મહત્ત્વનું બની રહેશે.
