મુંબઇ : ભારતની અંડર-19ના કેપ્ટન પૃથ્વી શૉ માસ્ટર બ્લાસ્ટર સચિન તેંડુલકર, વેસ્ટઈન્ડિઝના મહાન બેટ્સમેન બ્રાયન લારા અને ભારતીય ટીમના અત્યારના સુકાની વિરાટ કોહલીની ક્લબમાં શામેલ થઈ ગયો છે. પૃથ્વી શૉને લોકપ્રિય ટાયર કંપની MRF એ કરારબદ્ધ કર્યો છે. હવે પૃથ્વી બેટિંગ કરવા ઉતરશે ત્યારે તેના બેટ પર MRF કંપનીનો લોગો હશે.
શાનદાર પ્રદર્શન કરી રહ્યો છે પૃથ્વી
પૃથ્વીએ MRF સાથે કરાર કરીને દુનિયાના શાનદાર ક્રિકેટર્સની લિસ્ટમાં પોતાનું નામ નોંધાવી દીધું છે. આ લિસ્ટમાં ઓસ્ટ્રેલિયાનો ભૂતપૂર્વ કેપ્ટન સ્ટીવ વૉ પણ છે. ઉલ્લેખનીય છે કે, સાઉથ આફ્રિકાનો સ્ટાર બેટ્સમેન એબી ડી વિલિયર્સ પર MRF સાથે કરારબદ્ધ છે. પૃથ્વીએ રણજી અને દુલીપ ટ્રોફીની પોતાની પહેલી મેચમાં સદીઓ ફટકારી હતી.
આ ઉપરાંત તેણે ફર્સ્ટ ક્લાસ ક્રિકેટની આઠ મેચોમાં પાંચ સેન્ચુરી નોંધાવી છે. આ અંગે વાત કરતા પૃથ્વીએ જણાવ્યું કે, ‘આ મારા માટે ખૂબ જ સન્માનની વાત છે અને હું ટૂંક સમયમાં MRFના બેટ સાથે રમતો દેખાઈશ. હું સચિન અને લારાને આ બેટ સાથે રમતા જોઈને મોટો થયો છું. વિરાટ પણ આ જ કંપનીના બેટ સાથે રમે છે. હું આ માટે કંપનીનો આભાર માનું છું.’
MRF ના અધ્યક્ષ અને મેનેજિંગ ડિરેક્ટર મમ્મને જણાવ્યું કે, તેમની કંપની હંમેશાં ઉત્કૃષ્ટ ખેલાડીઓને સપોર્ટ કરે છે. માત્ર નેશનલ જ નહીં ઈન્ટરનેશનલ સ્તરે પણ કંપની ટેલેન્ટેડ ખેલાડીઓની મદદ માટે હંમેશાં પ્રયત્નશીલ છે. પૃથ્વી શૉને કંપની સાથે જોડીને અમે ખુશ છીએ અને તે શાનદાર પ્રદર્શન જાળવી રાખશે તેવી આશા છે.