Mumbai Indians: મુંબઈ ઇન્ડિયન્સે ‘ધ હન્ડ્રેડ’ લીગની છઠ્ઠી ટીમ ખરીદી, અંબાણી પરિવાર માટે એક નવી સિદ્ધિ
Mumbai Indians 5 વખત IPL ટાઇટલ જીતનાર મુંબઈ ઇન્ડિયન્સે વધુ એક મોટું પગલું ભર્યું છે. આ વખતે તેણે ઇંગ્લેન્ડની પ્રતિષ્ઠિત ધ હન્ડ્રેડ લીગમાં એક નવી ટીમ ખરીદી છે. મુંબઈ ઈન્ડિયન્સે ધ હન્ડ્રેડ લીગની ચેમ્પિયન ટીમ ઓવલ ઈન્વિન્સિબલ્સમાં 49 ટકા હિસ્સો ખરીદવાનો નિર્ણય લીધો છે. આ ટીમે અત્યાર સુધીમાં બે વાર ધ હંડ્રેડ ટાઇટલ જીત્યું છે અને તે લીગની ડિફેન્ડિંગ ચેમ્પિયન પણ છે.
મુંબઈ ઈન્ડિયન્સ દ્વારા મોટું રોકાણ
Mumbai Indians આ પગલું મુંબઈ ઇન્ડિયન્સ માટે મહત્વપૂર્ણ છે કારણ કે રિલાયન્સ ઇન્ડસ્ટ્રીઝે સીવીસી કેપિટલ અને અન્ય ઉચ્ચ-પ્રોફાઇલ રોકાણકારોને પાછળ છોડીને ટીમમાં હિસ્સો ખરીદ્યો છે. અહેવાલો અનુસાર, ઓવલ ઇન્વિન્સિબલ્સ પર સૌથી વધુ બોલી ૧૨૩ મિલિયન પાઉન્ડ (લગભગ ૧,૨૪૦ કરોડ રૂપિયા) હતી. મુંબઈ ઇન્ડિયન્સે તેના માટે લગભગ 60 મિલિયન પાઉન્ડ (રૂ. 645 કરોડ) ચૂકવ્યા, જે એક મોટું રોકાણ દર્શાવે છે.
આ સાથે, ઓવલ ઇન્વિન્સિબલ્સ મુંબઈ ઇન્ડિયન્સ હેઠળ આવનારી છઠ્ઠી ટીમ બની ગઈ છે. અગાઉ, મુંબઈ ઇન્ડિયન્સે IPL, મહિલા પ્રીમિયર લીગ (WPL), મેજર લીગ ક્રિકેટમાં MI ન્યૂ યોર્ક, SA20 માં MI કેપ ટાઉન અને ILT20 માં MI અમીરાત જેવી ટીમોનું સંચાલન કર્યું છે.
અંબાણી પરિવારની વૈશ્વિક વિસ્તરણ યોજના
મુંબઈ ઈન્ડિયન્સના આ પગલાથી અંબાણી પરિવારની વૈશ્વિક ક્રિકેટમાં વિસ્તરણ કરવાની યોજનાઓને વધુ મજબૂતી મળી છે. પહેલા એવા અહેવાલો હતા કે અંબાણી પરિવાર લંડન સ્પિરિટ જેવી ટીમ ખરીદવાની યોજના બનાવી રહ્યો છે, પરંતુ હવે તેણે ઓવલ ઇન્વિન્સિબલ્સમાં હિસ્સો ખરીદ્યો છે. રસપ્રદ વાત એ છે કે, ગૂગલના સીઈઓ સુંદર પિચાઈએ પણ ઓવલ ઈન્વિન્સીબલ્સમાં રસ દાખવ્યો હતો, પરંતુ આખરે, મુંબઈ ઈન્ડિયન્સે ટીમ જીતી લીધી.
આગામી દિવસોમાં શું થઈ શકે છે?
મુંબઈ ઈન્ડિયન્સ હવે ઓવલ ઈન્વિન્સીબલ્સમાં 49 ટકા હિસ્સો ધરાવે છે, જ્યારે સરે કાઉન્ટી ક્રિકેટ ક્લબ બાકીનો 51 ટકા હિસ્સો જાળવી રાખે છે. જો સરે ક્લબ ભવિષ્યમાં તેના શેર વેચવા માંગે છે, તો મુંબઈ ઇન્ડિયન્સ આખી ટીમની માલિકી મેળવી શકે છે. હાલમાં, સરે ક્લબના શેર વેચવાની કોઈ યોજના નથી, પરંતુ ભવિષ્યમાં આ બીજું એક મોટું પગલું હોઈ શકે છે.
મુંબઈ ઇન્ડિયન્સનું આ નવું રોકાણ ક્રિકેટની દુનિયામાં તેમનો અને અંબાણી પરિવારનો પ્રભાવ વધુ મજબૂત બનાવશે.
