રવિવારે પોર્ટ ઓફ સ્પેનમાં રમાયેલી વેસ્ટઇન્ડિઝ સામેની બીજી વનડેમાં ભારતીય ટીમે વિરાટ કોહલીની સદી અને શ્રેયસ ઐય્યરની અર્ધસદીની મદદથી 50 ઓવરમાં 7 વિકેટના ભોગે 279 રનનો સ્કોર બનાવીને યજમાન ટીમ સામે 280 રનનો પડકાર મુક્યો હતો. જો કે યજમાન ટીમની ઇનિંગ દરમિયાન 12.5 ઓવરની રમત પછી વરસાદી વિઘ્ન આવતા ડકવર્થ લુઇસ નિયમ હેઠળ તેમને 46 ઓવરમાં 270 રનનો સુધારાયેલો લક્ષ્યાંક અપાયો હતો. તેની સામે વિન્ડીઝ ટીમ 42 ઓવરમાં 210 રને ઓલઆઉટ થઇ જતાં ભારતીય ટીમનો 59 રને વિજય થયો હતો. 120 રનની ઇનિંગ રમનારા કોહલીને મેન ઓફ ઘ મેચ જાહેર કરાયો હતો.
280 રનના લક્ષ્યાંકને પામવા મેદાને પડેલી વેસ્ટઇન્ડિઝની ટીમની શરૂઆત ધીમી રહી હતી અને 8.3 ઓવરમાં તેમનો સ્કોર 45 રન હતો ત્યારે પોતાની 300મી વન ડે રમી રહેલો ક્રિસ ગેલ માત્ર 11 રન કરીને આઉટ થયો હતો. થોડી જ વારમાં શાઇ હોપ પણ આઉટ થયો હતો. એવીન લુઇસે એક છેડો સાચવી રાખ્યો હતો, તેણે 18 રન કરનારા શિમરન હેટમાયર સાથે 40 રનની અને નિકોલસ પૂરન સાથે 56 રનની ભાગીદારી કરી હતી. આ બંને ભાગીદારી કુલદીપ યાદવે તોડી હતી. તેણે હેટમાયરને અને પછી લુઇસને આઉટ કર્યો હતો. લુઇસે 80 બોલમાં 65 રન કર્યા હતા. તે પછી પૂરન 42 રન કરીને અને રોસ્ટન ચેઝ 18 રન કરીને ભુવનેશ્વરના શિકાર બન્યા પછી વેસ્ટઇન્ડિઝના વિજયની સંભાવના પુરી થઇ ગઇ હતી અને અંતે તેઓ 42 ઓવરમાં 210 રને ઓલઆઉટ થયાં હતા. ભારત વતી ભુવનેશ્વરે 4, મહંમદ શમી અને કુલદીપ યાદવે 2-2 જ્યારે રવિન્દ્ર જડેજા અને ખલીલ અહેમદે 1-1 વિકેટ ઉપાડી હતી.
આ પહેલા ભારતીય કેપ્ટન વિરાટ કોહલીએ સતત પાંચમીવાર ટોસ જીત્યો હતો અને તેણે દાવ લેવાનો નિર્ણય લીધો હતો. જો કે શિખર ધવન ફરી એકવાર ફેલ જવાને કારણે ભારતીય ટીમની શરૂઆત ખરાબ રહી હતી. ધવન માત્ર 2 રન કરીને આઉટ થયો હતો. તે પછી રોહિત શર્મા સાથે રમતમાં જોડાયેલા વિરાટ કોહલીએ શરૂઆતથી જ ફટકા મારવાનું શરૂ કરીને અલગ મુડમાં હોવાનું જાહેર કરી દીધું હતુ. વિરાટ અને રોહિત વચ્ચે 74 રનની ભાગીદારી થઇ હતી, જો કે તેમાં રોહિતના માત્ર 18 રન હતા, રોહિત 34 બોલમાં 18 રન કરીને આઉટ થયો અને પંત 20 રન કરીને આઉટ થયો હતો. તે પછી કોહલીની સાથે શ્રેયસ ઐય્યર જોડાયો હતો અને બંને વચ્ચે 125 રનની મજબૂત ભાગીદારી થઇ હતી. સ્કોર 226 પર પહોંચ્યો ત્યારે કોહલી આઉટ થયો હતો. તે પછી સ્કોર 250 પર પહોંચ્યો ત્યારે ઐય્યર 71 રન કરીને આઉટ થયો હતો. તે પછી અંતે ભારતીય ટીમનો સ્કોર નિર્ધારિત 50 ઓવરમાં 7 વિકેટે 279 રન કર્યા હતા.