T20 વર્લ્ડ કપ 2024 માટે આદર્શ સંયોજન શોધવાના ભારતના પ્રયાસોને રવિવારે જ્યારે દક્ષિણ આફ્રિકા સામેની પ્રથમ T20I મેચ સતત વરસાદને કારણે એક પણ બોલ ફેંક્યા વિના રદ્દ કરવામાં આવી ત્યારે આંચકો લાગ્યો. સતત વરસાદને કારણે મેચમાં ટોસ પણ થઈ શક્યો ન હતો. મેચ ભારતીય સમય અનુસાર 7.30 વાગ્યે શરૂ થવાની હતી પરંતુ સતત વરસાદને કારણે પિચને ઢાંકી દેવામાં આવી હતી. લગભગ બે કલાકની રાહ જોયા બાદ અમ્પાયરોએ મેચ પડતી મૂકવાનો નિર્ણય કર્યો હતો. ત્રણ મેચની સીરિઝની બીજી ટી-20 મંગળવારે કેબરહામાં 12 ડિસેમ્બરે રમાશે. કેબરહા અગાઉ પોર્ટ એલિઝાબેથ તરીકે ઓળખાતું હતું.
હવે ભારતીય ટીમને આવતા વર્ષે વેસ્ટ ઈન્ડિઝ અને અમેરિકામાં યોજાનાર ટી20 વર્લ્ડ કપ પહેલા માત્ર પાંચ વધુ ટી20 મેચ રમવા મળશે. આમાંથી બે T20 દક્ષિણ આફ્રિકા સામે ચાલી રહેલી શ્રેણીમાં રમાશે જ્યારે ત્રણ મેચ જાન્યુઆરીમાં અફઘાનિસ્તાન સામે ઘરઆંગણે રમાશે.
IPL 2024 T20 વર્લ્ડ કપ પહેલા રમાશે અને આવી સ્થિતિમાં પસંદગીકારોની નજર આ પ્રતિષ્ઠિત T20 લીગ પર હશે જેથી વર્લ્ડ કપ માટે પરફેક્ટ 15 ખેલાડીઓની પસંદગી કરવામાં આવે.
જોકે, પ્રથમ વખત દક્ષિણ આફ્રિકાની મુલાકાતે આવેલા રિંકુ સિંહ, જીતેશ શર્મા અને અર્શદીપ સિંહ જેવા ખેલાડીઓ મેચ રદ્દ થવાથી નિરાશ થશે. હવે આ ખેલાડીઓએ પોતાની પ્રતિભા બતાવવા માટે બીજી T20ની રાહ જોવી પડશે.
દક્ષિણ આફ્રિકાના પ્રવાસે આવતા પહેલા ભારતે ઘરઆંગણે પાંચ મેચની T20 શ્રેણીમાં ઓસ્ટ્રેલિયાને 4-1થી હરાવ્યું હતું. આ શ્રેણીમાં ટીમનું નેતૃત્વ કરતી વખતે સૂર્યકુમાર યાદવે પ્રભાવિત કર્યા હતા.
