ભારત અને ઓસ્ટ્રેલિયા વચ્ચે પાંચ મેચોની શ્રેણીની ત્રીજી T20 આંતરરાષ્ટ્રીય મેચ આજે ગુવાહાટીના બરસાપારા ક્રિકેટ સ્ટેડિયમમાં રમાશે. સૂર્યકુમાર યાદવની આગેવાની હેઠળની ટીમ ઈન્ડિયાએ શ્રેણીમાં 2-0ની સરસાઈ મેળવી લીધી છે અને ત્રીજી મેચ જીતીને ભારત શ્રેણીમાં અજેય લીડ લેવા ઈચ્છશે. જો ટીમ ઈન્ડિયા આજે જીતશે તો તે T20 ઈન્ટરનેશનલમાં સૌથી વધુ જીતના મામલે પાકિસ્તાનને પાછળ છોડી દેશે. ભારત અને પાકિસ્તાન બંનેના ખાતામાં 135-135 જીત છે. ભારતે ઓસ્ટ્રેલિયા સામેની આ શ્રેણીની બીજી T20 આંતરરાષ્ટ્રીય મેચ જીતીને પાકિસ્તાનની બરાબરી કરી લીધી છે. ભારત અને પાકિસ્તાન સિવાય, ન્યુઝીલેન્ડ એકમાત્ર એવી ક્રિકેટ ટીમ છે જેણે 100 થી વધુ T20 આંતરરાષ્ટ્રીય મેચો જીતી છે. ન્યુઝીલેન્ડે કુલ 102 T20 આંતરરાષ્ટ્રીય મેચ જીતી છે.
T20 ઈન્ટરનેશનલમાં ભારતનું પ્રદર્શન અત્યાર સુધી મજબૂત રહ્યું છે. ટીમ ઈન્ડિયાએ કુલ 211 T20 ઈન્ટરનેશનલ મેચ રમી છે, જેમાંથી તેણે 135માં જીત મેળવી છે, જ્યારે 66 મેચોમાં તેને હારનો સામનો કરવો પડ્યો છે. ભારતની જીતની ટકાવારી 63.98 છે. પાકિસ્તાને કુલ 226 T20 ઈન્ટરનેશનલ મેચ રમી છે, જેમાંથી તેણે 135માં જીત મેળવી છે, જ્યારે 82 મેચ હારી છે. ભારતે અત્યાર સુધી જે રીતે બંને મેચ જીતી છે તે રીતે ત્રીજી મેચમાં ઓસ્ટ્રેલિયા પર દબાણ રહેશે.
સીરીઝની ત્રીજી મેચ ઓસ્ટ્રેલિયા માટે કરો યા મરોની રહેશે. ભારતે પ્રથમ T20 ઈન્ટરનેશનલ મેચ બે વિકેટથી જીતી હતી, જ્યારે બીજી મેચમાં 44 રનથી શાનદાર જીત નોંધાવી હતી. છેલ્લી મેચમાં ભારતે 235 રન બનાવ્યા હતા અને જવાબમાં ઓસ્ટ્રેલિયાની ટીમ માત્ર 191 રન જ બનાવી શકી હતી. આવતા વર્ષે ICC T20 વર્લ્ડ કપ રમાવાનો છે અને આ સંદર્ભમાં આ શ્રેણી બંને ટીમો માટે ખૂબ જ મહત્વપૂર્ણ છે. ટી20 વર્લ્ડ કપમાં હવે વધુ સમય બાકી નથી. T20 વર્લ્ડ કપ 4 જૂનથી 30 જૂન વચ્ચે રમાશે, જેની યજમાની અમેરિકા અને વેસ્ટ ઈન્ડિઝ કરશે.
