ઓસ્ટ્રેલિયાનો સ્ટાર ઓલરાઉન્ડર ગ્લેન મેક્સવેલ ફરી એકવાર ઈજાગ્રસ્ત થયો છે. મેક્સવેલ હાલમાં બિગ બેશ લીગમાં રમી રહ્યો છે. ગ્લેન મેક્સવેલને ગુરુવારે (7 ડિસેમ્બર) બ્રિસ્બેન હીટ સામેની શરૂઆતની મેચમાં બેટિંગ કરતી વખતે હાથની ઈજા થઈ હતી, જેના કારણે તે ખૂબ જ પીડામાં દેખાતો હતો પરંતુ તે હજુ પણ રમતા જોવા મળ્યો હતો. આ ઈજાના કારણે તે પર્થ સ્કોર્ચર્સ સામેની આગામી મેચમાંથી બહાર થઈ ગયો છે. ODI વર્લ્ડ કપ 2023 દરમિયાન ગ્લેન મેક્સવેલ શાનદાર ફોર્મમાં હતો અને તેણે એક મેચમાં બેવડી સદી ફટકારી હતી.
બિગ બેશ લીગની નવી સીઝનની શરૂઆત બ્રિસ્બેન હીટ અને મેલબોર્ન સ્ટાર્સ વચ્ચેની મેચથી થઈ હતી. આ મેચમાં ગ્લેન મેક્સવેલની આગેવાની હેઠળની મેલબોર્ન સ્ટાર્સને કારમી હારનો સામનો કરવો પડ્યો હતો. પ્રથમ બેટિંગ કરતા બ્રિસ્બેન હીટે 20 ઓવરમાં 3 વિકેટ ગુમાવીને 214 રન બનાવ્યા હતા. જવાબમાં મેલબોર્ન સ્ટાર્સની ટીમ 15.1 ઓવરમાં તમામ વિકેટ ગુમાવીને માત્ર 111 રન જ બનાવી શકી હતી. બોલરો બાદ મેલબોર્ન તરફથી બેટ્સમેનોએ પણ નિરાશ કર્યા હતા.
215 રનના લક્ષ્યનો પીછો કરવા ઉતરેલી મેલબોર્નની ઇનિંગ્સની શરૂઆત ખરાબ રહી હતી. ટીમે પ્રથમ જ ઓવરમાં બે વિકેટ ગુમાવી દીધી હતી. આ પછી કેપ્ટન ગ્લેન મેક્સવેલે ઈનિંગને સંભાળવાનો પ્રયાસ કર્યો પરંતુ તે ઈજાગ્રસ્ત થઈ ગયો. બેટિંગ કરતી વખતે તેના હાથમાં ઈજા થઈ હતી. જેના કારણે તે દર્દમાં જોવા મળી રહ્યો હતો. જો કે, બે વખત તબીબી સારવાર લીધા પછી પણ તે અડગ રહ્યો.
છઠ્ઠી ઓવરમાં ગ્લેન મેક્સવેલ 14 બોલમાં 23 રન બનાવીને પેવેલિયન પરત ફર્યો હતો. જે પછી મેલબોર્ન નિયમિત અંતરે વિકેટ ગુમાવી અને મેચ હારી ગઈ. બ્રિસ્બેન તરફથી માઈકલ સ્વેપ્સને ત્રણ, નેસર અને ઝેવિયરે 2-2 વિકેટ ઝડપી હતી. આ પહેલા બ્રિસ્બેન હીટે મુનરોના અણનમ 99 રનની મદદથી 214 રન બનાવ્યા હતા. પોતાની ઇનિંગમાં તેણે 61 બોલનો સામનો કર્યો અને 9 ફોર અને 5 સિક્સર ફટકારી.
ગયા વર્ષે પણ મેક્સવેલ ઈજાગ્રસ્ત થયો હતો અને તેના પગની સર્જરી થઈ હતી. તાજેતરમાં પૂરા થયેલા ODI વર્લ્ડ કપ દરમિયાન તે ગોલ્ફ કાર્ટમાંથી પડી ગયો હતો અને ઈજાગ્રસ્ત થયો હતો. જોકે, તેણે તરત જ વાપસી કરી હતી.
