Shikhar Dhawan શિખર ધવનને દિલ્હી હાઈકોર્ટથી રાહત, બેટરી કંપની પર તેમનો ફોટો વાપરવા પર પ્રતિબંધ
Shikhar Dhawan ભારતીય ક્રિકેટ ટીમના ભૂતપૂર્વ ખેલાડી શિખર ધવનને મોટી રાહત આપતા, દિલ્હી હાઈકોર્ટે ડીબી ડિક્સન બેટરી કંપનીને તેમના ઉત્પાદનો અને જાહેરાતોમાં ધવનના ચિત્રોનો ઉપયોગ કરવાથી રોકી દીધી છે. શિખર ધવને એક અરજી દાખલ કરી હતી જેમાં તેમણે આરોપ લગાવ્યો હતો કે બેટરી કંપનીએ તેમની અને કંપની વચ્ચેના કરારની મુદત પૂરી થયા પછી પણ તેમની બ્રાન્ડ વેલ્યુનો દુરુપયોગ કર્યો છે.
Shikhar Dhawan આ કેસ એક એન્ડોર્સમેન્ટ કરાર સાથે સંબંધિત છે જેના હેઠળ બેટરી કંપનીને ધવનના ફોટાનો ઉપયોગ કરવાની મંજૂરી આપવામાં આવી હતી. જોકે, ત્રણ મહિના પછી જ કરાર પર વિવાદ ઊભો થયો. ધવને આરોપ લગાવ્યો કે કંપનીએ તેમના બ્રાન્ડનો ઉપયોગ કરીને તેના ઉત્પાદનોની જાહેરાત કરી, જે કરાર પૂરો થયા પછી ખોટું હતું.
ધવનના વકીલ રિઝવાને કોર્ટને જણાવ્યું હતું કે જ્યાં સુધી આ વિવાદ મધ્યસ્થી દ્વારા ઉકેલાય નહીં ત્યાં સુધી બેટરી કંપનીને શિખર ધવનના ફોટા તેના પ્રચારમાંથી દૂર કરવાનો નિર્દેશ આપવો જોઈએ. આ ઉપરાંત, વકીલે કેસમાં મધ્યસ્થી નિમણૂકની પણ માંગ કરી હતી.
ધવનના વકીલે એમ પણ કહ્યું કે બેટરી કંપનીએ કરાર સમાપ્ત થયા પછી પણ ધવનને 30 લાખ 24 હજાર રૂપિયાની રકમ ચૂકવી નથી. કોર્ટે આ કેસમાં શિખર ધવનને વચગાળાની રાહત આપી છે અને બેટરી કંપનીને આગામી સુનાવણી સુધી ધવનના ફોટાનો ઉપયોગ કરવાથી રોકી દીધી છે. હવે આ કેસની આગામી સુનાવણી ૧૮ ફેબ્રુઆરી ૨૦૨૫ ના રોજ થશે.
