સબીના પાર્ક ખાતે રમાઇ રહેલી બીજી ટેસ્ટમાં પણ ભારતીય ટીમ જીત ભણી આગળ વધી છે. પહેલા દાવમાં 416 રન કર્યા પછી વેસ્ટઇન્ડિઝની પ્રથમ ઇનિંગ 117 રને સમેટીને ભારતે 299 રનની સરસાઇ મેળવી હતી. તે પછી વેસ્ટઇન્ડિઝને ફોલોઓન ન આપીને ભારતે પોતાનો બીજો દાવ 4 વિકેટે 168 રન કરીને દાવ ડિક્લેર કરીને વેસ્ટઇન્ડિઝ 468 રનનો લક્ષ્યાંક મુક્યો હતો. જેની સામે ત્રીજા દિવસની રમત પૂર્ણ થઇ ત્યારે વેસ્ટઇન્ડિઝે બે વિકેટના ભોગે 45 રન બનાવ્યા હતા. રમત બંધ રહી ત્યારે શમરાહ બ્રુક્સ 4 અને ડેરેન બ્રાવો 18 રને રમતમાં હતા, વેસ્ટઇન્ડિઝ હજુ લક્ષ્યથી 423 રન દૂર છે.
બીજા દાવમાં વિશાળ લક્ષ્ચાંકની સામે વેસ્ટઇન્ડિઝની ટીમ પ્રેશરમાં આવી ગઇ હતી. ઓપનર ક્રેગ બ્રેથવેટ માત્ર 3 રને ઇશાંત શર્માના બોલે વિકેટ પાછળ ઋષભ પંતના હાથમાં ઝિલાયો હતો. તે પછી મહંમદ શમીએ જોન કેમ્પબેલને અંગત 16 રને કેપ્ટન કોહલીના હાથમાં ઝિલાવ્યો હતો. આ પહેલા ભારતીય ટીમે વેસ્ટઇન્ડિઝને ફોલોઓન ન આપીને પોતાનો બીજો દાવ શરૂ કર્યો હતો. કેએલ રાહુલ અને મયંક અગ્રવાલ ફરી એકવાર સારી શરૂઆત અપાવવામાં નિષ્ફળ ગયા હતા. મયંક અગ્રવાલ અંગત 4 રને એલબીડબલ્યુ આઉટ થયો હતો.
તે પછી રોચે 21મી ઓવરમાં રાહુલને અંગત 6 રને અને તેના બીજા જ બોલે કોહલીને શૂન્ય રને આઉટ કરીને ભારતને બે ઝાટકા આપ્યા હતા. તે પછી પુજારા 27 રન કરીને આઉટ થતાં ભારતનો સ્કોર 4 વિકેટે 57 રન થયો હતો. અહીંથી અજિંકેય રહાણેએ નોટઆઉટ 64 અને હનુમા વિહારીએ નોટઆઉટ 53 રન કરીને સ્કોર 4 વિકેટે 168 રન પર પહોંચાડ્યો ત્યારે કેપ્ટન કોહલીએ દાવ ડિકલેર કર્યો હતો.