Inflation: જથ્થાબંધ ફુગાવો 3 મહિનામાં સૌથી નીચા સ્તરે, નવેમ્બરમાં ઘટીને 1.89% થયો, ખાદ્ય ચીજો સસ્તી થઈ.
Inflation: મોંઘવારી મોરચે મોટી રાહત મળી છે. રિટેલ મોંઘવારી બાદ હવે જથ્થાબંધ મોંઘવારી દરમાં પણ ઘટાડો થયો છે. સરકારી આંકડા મુજબ નવેમ્બરમાં જથ્થાબંધ ભાવ આધારિત ફુગાવો ઘટીને 1.89 ટકા થયો હતો. આ 3 મહિનાની નીચી સપાટી છે. જથ્થાબંધ મોંઘવારી દરમાં ઘટાડો થવાનું મુખ્ય કારણ ખાદ્ય ચીજવસ્તુઓ, ખાસ કરીને શાકભાજીના ભાવમાં નરમાઈ હતી. સોમવારે જાહેર કરવામાં આવેલા સરકારી આંકડામાં આ માહિતી આપવામાં આવી છે. ઓક્ટોબર 2024માં હોલસેલ પ્રાઇસ ઇન્ડેક્સ (WPI) આધારિત ફુગાવો 2.36 ટકા હતો. નવેમ્બર 2023માં તે 0.39 ટકા હતો.
ખાદ્ય ચીજો સસ્તી થઈ
સસ્તી ખાદ્ય ચીજવસ્તુઓના કારણે ખાદ્ય ચીજવસ્તુઓમાં મોંઘવારી દર નવેમ્બરમાં ઘટીને 8.63 ટકા પર આવી ગયો હતો, જ્યારે ઓક્ટોબરમાં તે 13.54 ટકા હતો. શાકભાજીનો ફુગાવો ઘટીને 28.57 ટકા થયો છે, જ્યારે ઓક્ટોબરમાં તે 63.04 ટકા હતો. જોકે, નવેમ્બરમાં બટાકાનો ફુગાવો 82.79 ટકાના સ્તરે ઊંચો રહ્યો હતો, જ્યારે ડુંગળીનો ફુગાવો ઝડપથી ઘટીને 2.85 ટકા થયો હતો. ઈંધણ અને વીજળીની શ્રેણીમાં ફુગાવો 5.83 ટકા હતો જ્યારે ઓક્ટોબરમાં તે 5.79 ટકા હતો. ઉત્પાદિત માલનો ફુગાવો નવેમ્બરમાં 2 ટકા હતો જે ઓક્ટોબરમાં 1.50 ટકા હતો.
રિટેલ મોંઘવારી દરમાં પણ ઘટાડો જોવા મળ્યો હતો
અગાઉ રિટેલ મોંઘવારી દરમાં પણ ઘટાડો નોંધાયો હતો. નવેમ્બરમાં છૂટક ફુગાવો ઘટીને 5.48 ટકા થયો હતો. ઓક્ટોબરમાં તે 6.21 ટકાના સ્તરે હતો. તેનું મુખ્ય કારણ ખાદ્ય ચીજવસ્તુઓ ખાસ કરીને શાકભાજીના ભાવમાં નરમાઈ છે. નેશનલ સ્ટેટિસ્ટિકલ ઓફિસ (NSO) દ્વારા જાહેર કરાયેલા કન્ઝ્યુમર પ્રાઇસ ઇન્ડેક્સ (CPI) ડેટા અનુસાર, નવેમ્બરમાં ખાદ્ય ફુગાવો ઘટીને 9.04 ટકા થયો હતો. ઓક્ટોબરમાં તે 10.87 ટકા અને નવેમ્બર 2023માં 8.70 ટકા હતો.
