Adani: બોમ્બે હાઈકોર્ટ તરફથી ગૌતમ અદાણીને રાહત, બજાર નિયમન ઉલ્લંઘન કેસમાં નિર્દોષ જાહેર
Adani: અદાણી ગ્રુપના ચેરમેન ગૌતમ અદાણી અને મેનેજિંગ ડિરેક્ટર રાજેશ અદાણીને સોમવારે બોમ્બે હાઈકોર્ટમાંથી મોટી રાહત મળી છે. લગભગ 388 કરોડ રૂપિયાના બજાર નિયમનના કથિત ઉલ્લંઘનના કેસમાં હાઇકોર્ટે તેમને નિર્દોષ જાહેર કર્યા છે. સીરિયસ ફ્રોડ ઇન્વેસ્ટિગેશન ઓફિસ (SFIO) એ 2012 માં અદાણી એન્ટરપ્રાઇઝ લિમિટેડ (AEL) અને તેના પ્રમોટરો ગૌતમ અદાણી, રાજેશ અદાણી સામે કેસ શરૂ કર્યો હતો અને તેમના પર ગુનાહિત કાવતરું અને છેતરપિંડીનો આરોપ મૂક્યો હતો. તે જ સમયે ચાર્જશીટ દાખલ કરવામાં આવી.
વર્ષ 2019 માં, બંને ઉદ્યોગપતિઓએ હાઇકોર્ટનો સંપર્ક કર્યો હતો. તેમણે તે જ વર્ષના સેશન્સ કોર્ટના આદેશને રદ કરવાની માંગ કરતી અરજી દાખલ કરી હતી. સેશન્સ કોર્ટે તેમને કેસમાંથી મુક્ત કરવાનો ઇનકાર કર્યો હતો. સોમવારે જસ્ટિસ આર.એન. લદ્દાની આગેવાની હેઠળની હાઇકોર્ટની સિંગલ બેન્ચે સેશન્સ કોર્ટના આદેશને રદ કર્યો અને બંનેને કેસમાંથી મુક્ત કર્યા.
SFIO એ 2012 માં ચાર્જશીટ દાખલ કરી હતી
ડિસેમ્બર 2019 માં, હાઇકોર્ટે સેશન્સ કોર્ટના આદેશ પર સ્ટે આપ્યો હતો અને તેને સમયાંતરે લંબાવવામાં આવ્યો હતો. ૨૦૧૨માં, SFIO એ અદાણી સહિત ૧૨ લોકો સામે ગુનાહિત કાવતરું અને છેતરપિંડીનો આરોપ લગાવીને ચાર્જશીટ દાખલ કરી હતી, પરંતુ મે ૨૦૧૪માં મુંબઈની મેજિસ્ટ્રેટ કોર્ટે તેમને આ કેસમાં નિર્દોષ છોડી દીધા હતા. SFIO એ નિર્દોષ છૂટવાના આદેશને પડકાર્યો.
સેશન્સ કોર્ટે મેજિસ્ટ્રેટના આદેશને રદ કર્યો હતો
નવેમ્બર 2019 માં, સેશન્સ કોર્ટે મેજિસ્ટ્રેટના આદેશને રદ કર્યો અને કહ્યું કે SFIO એ અદાણી ગ્રુપ દ્વારા ગેરકાયદેસર લાભનો કેસ બનાવ્યો છે. હાઈકોર્ટમાં કરેલી અરજીમાં, ઉદ્યોગપતિઓએ સેશન્સ કોર્ટના આદેશને “મનસ્વી અને ગેરકાયદેસર” ગણાવ્યો હતો. આ કેસમાં લગભગ 388 કરોડ રૂપિયાના બજાર નિયમન ઉલ્લંઘનના આરોપો સામેલ હતા. SFIO દ્વારા તપાસ દરમિયાન નિયમનકારી પાલન અને નાણાકીય વ્યવહારો અંગેની ચિંતાઓમાંથી આ કેસ ઉભો થયો હતો.
