ધ્યાન રાખજો / વાહન માટે વીમો ખરીદતા સમયે ભૂલથી પણ આ ભૂલ ના કરતા, કંપની ફગાવી શકે છે તમારું ક્લેમ

તમારા અંગત વાહન માટે વીમા પોલિસી ખરીદવી હંમેશા ફાયદાકારક હોય છે. નવું વાહન ખરીદતાની સાથે જ તમારે તેનો વીમો લેવો જોઈએ. તે જ સમયે, જ્યારે વીમો જૂનો થઈ જાય છે, ત્યારે તેને તરત જ રિન્યુ કરાવવું પડે છે. વીમા માટે હાલમાં ઘણી કંપનીઓ ઉપલબ્ધ છે. જો કે, આ કંપનીઓની વીમા પોલિસી પર શરતો અલગ હોઈ શકે છે. જો તમે તમારા વાહન માટે વીમા પોલિસી ખરીદવા અથવા રિન્યૂ કરવા માગો છો, તો તમારે કેટલીક બાબતો ધ્યાનમાં રાખવાની જરૂર છે.

અંગત વાહન માટે વીમો લેતી વખતે તમારે તમને જોઈતી બધી વસ્તુઓ તપાસવી જોઈએ. જો તમે આમ નહીં કરો તો તમને ઈન્સ્યોરન્સ ક્લેમ કરવામાં સમસ્યાનો સામનો કરવો પડી શકે છે. અહીં અમે તમને કેટલીક ટિપ્સ આપી રહ્યા છીએ જે વીમા પોલિસી લેતી વખતે તમારા માટે ઉપયોગી સાબિત થઈ શકે છે.

નિયમ અને શરતોને કાળજીપૂર્વક વાંચો

ઘણી વખત ઈન્સ્યોરન્સ ક્લેમ કરતી વખતે કંપનીઓ અમુક વખતે એવી રીતે ગૂંચવી નાખે છે જેના કારણે ગ્રાહકોને તેનો પૂરો લાભ મળતો નથી. આવી સ્થિતિમાં, વીમા પોલિસી લેતી વખતે તમારે તેમાં તમારા વાહન માટે જરૂરી બધી વસ્તુઓ તપાસવી જોઈએ. વીમા પોલિસીના નિયેમો અને શરતો કાળજીપૂર્વક વાંચવી જોઈએ. તે જ સમયે, પોલિસીને રિન્યુ કરતા પહેલાં તમે વર્તમાન વીમા કંપનીના વીમા કવરની બાકીની સાથે તુલના કરી શકો છો. આની મદદથી તમે ઓછા રૂપિયામાં સારી પોલિસી મેળવી શકો છો.

વિવિધ કંપનીઓની પોલિસીની સરખામણી કરીને જુઓ

જો તમે પહેલીવાર પોલિસી લઈ રહ્યા છો, તો વીમા કંપની પસંદ કરતા પહેલાં તમે એક કરતા વધુ કંપની પાસેથી પોલિસી ક્વોટેશન લઈ શકો છો. વીમા પોલિસી પસંદ કરવામાં મદદ કરવા માટે ઘણી થર્ડ પાર્ટી એપ્સ પણ ઉપલબ્ધ છે. તેના દ્વારા તમે વિવિધ કંપનીઓની પોલિસીની સરખામણી કરી શકો છો. ક્યારેક તમારા વાહનની કિંમત અને વીમા માટેના પ્રીમિયમ વચ્ચે તફાવત હોઈ શકે છે. આ રીતે તમે વધુ સારી પોલિસી પસંદ કરી શકશો.

ક્લેમ સેટલમેન્ટ રેશિયો જોવાનું ના ભૂલો

વીમા માટે કંપનીને અંતિમ સ્વરૂપ આપતા પહેલા તમારે તેનો સીએસઆર એટલે કે ક્લેમ સેટલમેન્ટ રેશિયો જોવો જોઈએ. આ તે રેશિયો છે જે તમને જણાવે છે કે છેલ્લા એક વર્ષમાં તે કંપનીએ કેટલા ઈન્સ્યોરન્સ ક્લેમ સેટલ કર્યા છે. એક વર્ષમાં મહત્તમ CSR સેટલ કરતી કંપની પસંદ કરવી તમારા માટે ફાયદાકારક રહેશે. આ કારણે ઈન્સ્યોરન્સ ક્લેમ કરવા પર તેના એપ્રૂવલની સંભાવના નોંધપાત્ર રીતે વધી જશે. આ સિવાય તમારે પોલિસી રિન્યુ કરતી વખતે હંમેશા સાચી માહિતી આપવી જોઈએ. તેની સાથે તમને ક્લેમ સમયે કોઈ સમસ્યાનો સામનો કરવો નહીં પડે.