Gujarat News: ૭ ટાંકા માટે ૧.૬ લાખ રૂપિયાનું બિલ! ગુજરાતની હોસ્પિટલનું બિલ જોઈને પરિવાર દંગ
Gujarat News: રાજકોટની જાણીતી વોકહાર્ટ હોસ્પિટલ પર ગંભીર આરોપો લાગ્યા છે. નાની સર્જરી માટે મોટી રકમ વસૂલવાનો મામલો સામે આવ્યો છે, જેમાં માત્ર 7 ટાંકા માટે 1.6 લાખ રૂપિયાનું બિલ બનાવવામાં આવ્યું હોવાનો દાવો કરવામાં આવી રહ્યો છે.
9 વર્ષના બાળક માટે 24 કલાકની હોસ્પિટલાઇઝેશન
હેનીલ પટેલ નામના 9 વર્ષના બાળકને અકસ્માતમાં હાથ પર ઈજા થઈ હતી. ઈજા સામાન્ય હોવા છતાં, તેને 24 કલાક માટે હોસ્પિટલમાં દાખલ કરવામાં આવ્યો. મેડિક્લેમ હેઠળ સારવાર પછી, તેને રજા આપવામાં આવી. જો કે, જ્યારે પરિવારજનોને બિલ આપવામાં આવ્યું, તો તેઓ ચોંકી ગયા. બિલની રકમ 1,60,000 રૂપિયા હતી, જેમાં માત્ર એક ડૉક્ટર માટે 61,000 રૂપિયા ચાર્જ કરવામાં આવ્યા હતા.
આરોપો અને વિવાદ
પરીવારજનોના જણાવ્યા મુજબ, બાળકને સાંજે હોસ્પિટલમાં દાખલ કરવામાં આવ્યું હતું, છતાં હોસ્પિટલે સવારે ડૉક્ટરની મુલાકાતનો ચાર્જ ઉમેર્યો હતો. હકીકતમાં, બાળકના હાથ પર કોઈ ઓપરેશન પણ કરાયું ન હતું, માત્ર ટાંકા લગાવવામાં આવ્યા હતા. જો કે, હોસ્પિટલએ 10,000 રૂપિયા રોકડા પણ વસૂલ્યા હતા.
હોસ્પિટલનું નિવેદન
વોકહાર્ટ હોસ્પિટલના સેન્ટ્રલ હેડ ડૉ. દુષ્યંત પટેલે આ મામલે નિવેદન આપતા કહ્યું કે, “દર્દીને તાત્કાલિક સારવારની જરૂર હતી. હાથમાં ઊંડી ઈજા અને ધૂળના કારણે ઈમરજન્સી સર્જરી કરવી પડી. ત્યારપછી, બીજા જ દિવસે તેમને રજા આપવામાં આવી.”
પરંતુ, ડૉ. હાર્દિક ધમસાણીએ 61,000 રૂપિયાનો ચાર્જ કેમ વસૂલ્યો તે અંગેનો જવાબ ટાળવામાં આવ્યો. સાથે જ, ડૉ. દુષ્યંત પટેલે વોકહાર્ટને બદલે અન્ય એક ખાનગી હોસ્પિટલની પ્રશંસા કરવાનું શરૂ કર્યું, જેનાથી વધુ પ્રશ્નો ઊભા થયા છે.
વોકહાર્ટ હોસ્પિટલ ફરીથી વિવાદમાં
વોકહાર્ટ હોસ્પિટલ અગાઉ પણ વિવાદમાં આવી ચૂકી છે. આ ઘટના પછી, દર્દી પરિવારોમાં ખાનગી હોસ્પિટલો દ્વારા ઓછી સારવાર માટે વધુ ચાર્જ વસૂલવાના મુદ્દે આશંકા વધી રહી છે.
