અજબ-ગજબ ડેસ્કઃ ‘રામ રાખે તેને કોણ ચાખે’, મારવા વાળા હજાર પરંતુ બચાવવાવાળો એક ઉપરવાળો જ છે. આવી કહેવતોને સાર્થક કરતો એક કિસ્સો વિયેતનામમાં સામે આવ્યો છે. અહીં 12 માળની બિલ્ડિંગ ઉપરથી 2 વર્ષની બાળકી નીચે પટકાઈ હતી. જોકે, 164 ફૂટ ઉપરથી માસૂમ નીચે પટકાવવા છતાં પણ તેનો જીવ બચી ગયો હતો. બાળકી જ્યારે પટકાઈ ત્યારે નીચે ઉભેલા ડિલિવરી મેને તેને કેચ કરી લીધી હતી અને તેનો જીવ બચાવ્યો હતો. આ વીડિયો સોશિયલ મીડિયા ઉપર ભારે વાયરલ થઈ રહ્યો છે. આ ડિલિવરી મેન બાળકી માટે ભગવાનનું સ્વરૂપ સમાન બની ગયો હતો.
આ ડિલિવરી મેનને હવે સ્થાનિક અખબારોમાં અસલી હીરોનો દરજ્જો મળી રહ્યો છે. આ રિયલ લાઈફ હીરોનું નામ છે ન્ગ્યેન નાગોસ મેનહ. 31 વર્ષીય ન્ગ્યેને જણાવ્યું કે તે એક ગ્રાહકને પાર્સલ ડિલિવર કરવા માટે હનોઈ ગયો હતો.
જ્યારે તે ગ્રાહકના આવવાની રાહ જોઈ રહ્યો હતો ત્યારે તેણે બાળકીના રડવાનો અવાજ સાંભળ્યો હતો. તેણે જોયું કે એક બાળકી બિલ્ડિંગના 12માં માળની બાલ્કનીમાં લટકી રહી હતી. આ જોતા જ તે તરત જ ઘટના સ્થળે પહોંચ્યો અને ઉપરથી નીચે પડેલી બાળકીને ખોળામાં જીલી લીધી હતી. આમ બાળકીનો જીવ બચી ગયો હતો.
જોકે, બાળકીના મોંઢામાંથી લોહી આવવાના કારણે હોસ્પિટલમાં દાખલ કરવામાં આવી હતી. જ્યાં તેની હાલત સ્વસ્થ્ય ગણવામાં આવી રહી છે. 164 ફૂટની ઊંચાઈએથી પડેલી બાળકીનો જીવ બચવાથી તેઓ ખુબ જ ખુશ હતા.
તેમણે વધુમાં જણાવ્યું કે બધુ ઝડપથી થયું પરંતુ તેમણે બાળકી ઉપરથી નજર હટવા ન દીધી અને અંતે બધુ સારું થયું. બાળકીનો જીવ બચી ગયો. રુવાડાં ઊભા કરનારી આ ઘટના બિલ્ડિંગની સામે બાજુએ રહેલી એક મહિલાએ પોતાના મોબાઈલમાં કેદ કરી હતી.
સાથે સાથે બાળકીની માતાને બુમો પાડીને બોલાવતી હતી. પરંતુ અંતર વધારે હોવાથી તેનો અવાજ પહોંચી શકે તેમ ન હતો. આ આખી ઘટનામાં ડિલિવરી મેન બાળકી માટે ભગનાવનું સ્વરૂપ ગણી શકાય.
